सभापतिको बेडरुममै छिरेर पूर्जी लेखिएको भन्दै रास्वपाको भर्त्सना

काठमाडौं : राष्ट्रिय स्वतन्त्र पार्टीले सभापति रवि लामिछानेको बेडरुमभित्रै छिरेर पूर्जी लेखिएकोप्रति भर्त्सना गरेको छ।

शुक्रबार राति ११ बजेदेखि १ बजेमसम्म बसेको केन्द्रीय सचिवालयको आकस्मिक भर्चुअल बैठकले नागरिकको बेडरुमभित्रै छिरेर कानुनी कागजात बनाउनु गैर-संवेदनशील र गैरकानुनी भएको निर्णय गरेको कार्यवाहक प्रवक्ता मनिष झाले जानकारी दिए।

विज्ञप्तिमा भनिएको छ, ‘पक्राउ पुर्जी नलिएरै पक्राउ गर्न आउने कुरा मात्र होइन, सभापतिको घरमा त्यो पनि बेडरुमभित्र बसेर जुन किसिमले पूर्जी लेख्ने अनौठो अभ्यास प्रहरीले गर्यो, विधिको शासनमा त्यो क्षम्य हुन सक्दैन। नागरिकको घरभित्र छिरेर कानुनी कागजात बनाउने गैर–संवेदनशील र गैरकानुनी कुराको भर्त्सना गर्दैछौँ।’

यस्तै, बैठकले उच्च अदालत तुलसीपुर, बुटवल इजलासले गरेको निर्णयलाई कानुनको एक तहको निर्णयको रूपमा बुझ्दै अर्को तह र ढोकामा न्यायको लागि अघि बढ्ने निर्णय पनि गरेको छ।

यसका अलावा बैठकले आज दिउँसो २ बजे चितवनको भरतपुरमा आयोजना हुन लागेको जनयात्रा शुभारम्भ सभालाई संयमित र भव्य रूपमा सफल पार्ने निर्णय गरेको छ।

साथै पार्टी सभापति लामिछानेले पार्टीको नेतृत्व जिम्मेवारीको लागि कार्यवाहक सभापतिमा उपसभापति डिपी अर्याललाई तोकेकोमा त्यसलाई अनुमोदन गर्ने निर्णय गरेको छ।

चैत २३, २०८१ शनिबार १०:१७:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।