राजावादी प्रदर्शनमा भारतीय नागरिक पनि, आपराधिक उपद्रवको आरोपमा हिरासतमा

काठमाडौँ : राजतन्त्रको पक्षमा नाराबाजी गरेको आरोपमा चैत १४ मा अमेरिकी नागरिक पक्राउ परे। पूर्वराजा ज्ञानेन्द्र शाहको तस्बिरसहित माइतीघर मण्डलामा नाराबाजी गरेपछि ५८ वर्षीय अमेरिकी नागरिक जुलियन किर्पाललाई प्रहरीले पक्राउ गरेको थियो।

उनी पहिला कुलमान घिसिङलाई बर्खास्त गर्ने सरकारको निर्णयको विरोधमा नाराबाजीमा उत्रिएका थिए। पछि पूर्वराजाको तस्बिरसहित नाराबाजी गर्न थालेपछि जिल्ला प्रहरी परिसर काठमाडौँले पक्राउ गरेको थियो।

चैत १५ मा राजा फर्काउन तीनकुनेमा आयोजना भएको राजावादीहरूको आन्दोलनमा समेत विदेशी नागरिक पक्राउ परे। शान्तिपूर्ण आन्दोलन भनेर हिंसा फैलाएको आरोपमा प्रहरीले पटक-पटक विभिन्न व्यक्तिहरूलाई पक्राउ गरेर दुई अभियोगमा अनुसन्धानका लागि हिरासतमा राखेको छ।

आन्दोलनकारीलाई उक्साउन संलग्न देखिएको र कार्यक्रम आयोजक समितिमा रहेका रवीन्द्र मिश्र, धवल शमशेर राणाहरूलाई राज्यविरुद्ध र संगठित अपराधको अभियोगमा अनुसन्धान गरिरहेको प्रहरीले ढुंगामुढा र तोडफोडमा संलग्नमाथि आपराधिक उपद्रवको अभियोग लगाएको छ।

यही आपराधिक उपद्रवको आरोपमा पक्राउ परेर पहिलो चरणमै अदालतबाट म्याद थपिनेमा भारतीय नागरिक समेत रहेको खुलेको छ। प्रहरी स्रोतका अनुसार भारतीय नागरिक रविरञ्जन कुमार सिंह अहिले आपराधिक उपद्रवमा संलग्न रहेको आरोपमा प्रहरी हिरासतमा छन्।

प्रहरी रेकर्ड अनुसार उनी भारत देशबैशाली हुसेनाकर्द पञ्चायतका हुन्। उनी काठमाडौँमा बस्दै आएका थिए। तोडफोडमा उनी संलग्न देखिएपछि प्रहरीले पहिलो चरणमा पक्राउ गरेको ४६ जनाको लटमा उनलाई समेत पक्राउ गरेको थियो।

चैत २२, २०८१ शुक्रबार १९:१३:२२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।