भारतीय प्रधानमन्त्रीसँग एक्ला एक्लै छलफल गर्ने प्रधानमन्त्री ओलीको प्रयास थाइल्यान्ड पुगेर पुरा भयो
काठमाडौं : आफ्नो नेतृत्वमा सरकार गठन भएदेखि नै प्रधानमन्त्री केपी शर्मा ओलीले भारत भ्रमणमा जान पटक-पटक प्रयास गरे। परराष्ट्रमन्त्री आरजु राणा देउवा औपचारिक-अनौपचारिक रूपमा भारत गएर माहौल बनाउन प्रयास गरे पनि भ्रमण तय भएन।
भारतीय प्रधानमन्त्री नरेन्द्र मोदीलाई नेपाल भ्रमण गराउन पनि प्रयास नभएको हैन। तर सफल भएन। अनि ओली चीन गए।
चीन भ्रमणपछि पनि भारतीय प्रधानमन्त्रीसँग भेट मिलाउन निरन्तर प्रयास भइरहेकै थियो। त्यो बल्ल जुर्यो थाइल्यान्डमा। बहु क्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिम्स्टेक)को छैटौँ शिखर सम्मेलनमा दुवै प्रधानमन्त्री सहभागी थिए। त्यहीँ भेट र वार्ता पनि भयो।
थाइल्यान्डको बैङ्ककस्थित होटेल मडारिन ओरियन्टलमा शुक्रवार प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच करिब ४५ मिनेट एक्ला एक्लै छलफल भयो। एक्ला एक्लै भएको छलफलका विषय बाहिरिएको छैन।
राससका विशेष प्रतिनिधिलाई संक्षिप्त प्रतिक्रिया दिँदै प्रधानमन्त्री ओलीले ‘राम्रो र सकारात्मक संवाद भएको’ संक्षिप्त प्रतिक्रिया मात्र दिए।
प्रधानमन्त्री ओलीले सामाजिक सञ्जालमा भेटवार्ता आत्मीय, सौहार्दपूर्ण, सार्थक र रचनात्मक रहेको लेखे। ‘विम्स्टेक शिखर सम्मेलनले उठान गरेका मुद्दाका साथै दुई देशीय सम्बन्ध र क्षेत्रीय सहकार्यलाई अगाडि बढाउन नयाँ साझेदारीका लागि यो संवाद महत्त्वपूर्ण हुने छ।’
भारतीय प्रधानमन्त्री मोदीले सामाजिक सञ्जाल एक्समा भेटवार्ता फलदायी रहेको लेखेका छन्।
‘हामीले भारत–नेपाल मित्रताका विभिन्न पक्षहरू विशेष गरी ऊर्जा, कनेक्टिभिटी, संस्कृति र डिजिटल प्रविधि जस्ता क्षेत्रहरूमा छलफल गर्यौँ’ उनले लेखेका छन्।
चैत २२, २०८१ शुक्रबार १८:४७:५२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
