राज्य व्यवस्था समितिको बैठकमा अश्रुग्याँसबारे 'ढाँटे' आइजिपीले

काठमाडौं : राज्य व्यवस्था समितिको बैठकमा नेपाल प्रहरीका प्रहरी महानिरीक्षक दीपक थापाले म्याद नाघेको अश्रुग्याँस प्रहार नभएको भन्दै झुट बोले। चैत १५ मा तीनकुनेमा राजावादी समूहले आयोजना गरेको कार्यक्रममा सुरक्षाकर्मीले प्रहार गरेको अश्रुग्याँस सन् २०१० र सन् २००२ मै म्याद सकिएको खोलहरू फेला परेको थियो।

अश्रुग्याँसमा ब्याच नम्बर समेत उल्लेख हुन्छ। सुरक्षा संगठनबाहेक अन्यले यो किन्न समेत पाउँदैन। कार्यक्रम विरोध स्थलमा फेला परेका अश्रुग्याँसका खोलहरूमा लेखिएको मितिबाट सुरक्षाकर्मीले म्याद सकिएको प्रयोग गरेको खुले पनि आइजिपी थापाले भने संसदीय समितिमै झूट बोले।

समितिका सभापति रामहरि खतिवडाले नै म्याद नाघेका अश्रुग्याँस प्रहार भयो भन्ने आएको छ भनेर प्रश्न सोधेका थिए। त्यसको जवाफमा थापाले भने ‘म्याद नाघेका प्रयोग गरेका छैनौँ । म्याद नाघेका अश्रुग्याँस नष्ट गर्ने गरिएको छ।'

प्रहरीले यस अगाडि पनि भिड नियन्त्रणमा प्रयोग गरेका अश्रुग्याँस मिति सकिएको फेला पर्ने गरेका थिए। झडपस्थलमा यसका खोलहरू फेला पर्दा जब म्याद सकिएको प्रयोग भएको खुल्छ अनि प्रहरीले यस्तै दाबी गर्छ। सरकारसँग नयाँ खरिदको लागि बजेट मागे पनि उपलब्ध नहुँदा म्याद सकिएका अश्रुग्याँस  प्रयोग हुने गरेको देखिन्छ।

एकै पटक ठूलो मात्रामा खरिद गरेर राख्दा प्राय भिड नियन्त्रणमा प्रयोग हुने यस्ता घातक हतियार म्याद सकिएको फेला पर्छन्। प्रहरीस्रोतको दाबी अनुसार भण्डारमा अहिले २०६२-०६३ को जनआन्दोलनमा प्रयोग गर्न किनेका अश्रुग्याँस समेत छन्।

चैत २२, २०८१ शुक्रबार १८:१२:४६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।