भृकुटीमण्डपमा दमन भएको भए न्यायिक आयोग गठन हुन्थ्यो, तीनकुनेको घटनामा गर्नु हुँदैन : रघुजी पन्त

काठमाडौं : एमाले सांसद रघुजी पन्तले तीनकुनेको घटनामा आयोग गठन गर्न जरुरी नभएको तर्क गरेका छन्।

प्रतिनिधि सभाको राज्य व्यवस्था तथा सुशासन समितिको शुक्रबारको बैठकमा सांसद पन्तले तीनकुने घटना हिंसात्मक र नियोजित भएको भन्दै यसबारेमा न्यायिक आयोग गठन गर्न जरुरी नभएको तर्क गरेका हुन्।

उनले भने, ‘यदि भृकुटीमण्डपमा प्रहरी दमन भएको भए, निश्चित रूपमा न्यायिक आयोग गठन हुन्थ्यो। तर, त्यो दिनको सामान्य होइन, हिंसात्मक हो, नियोजित हो। सुरक्षा संयन्त्रलाई असफल पार्न गरिएको हुनाले यसको छानबिन भइरहेकाले न्यायिक आयोग गठन गर्न जरुरी छैन।’

सांसद पन्तले प्रहरीले अनुसन्धान गरिरहेको बेला छानबिन आयोग बनाउन नहुने धारणा राखे।

‘हामी पनि टियर ग्यास र अश्रुग्याँस खाएर आएका व्यक्ति हौँ। कहिल्यै पनि बर्दीधारीलाई आक्रमण गरेनौँ। प्रहरीले अनुसन्धान गरिरहेका बेला छानबिन आयोग बनाउनु हुँदैन। राजनीतिक आवरणमा आपराधिक घटनामा भइरहेको छानबिनमा बाधा पुर्याउनु हुँदैन।’

पन्तले तीनकुनेमा भएको राजावादीको प्रदर्शन पूर्व राजा ज्ञानेन्द्र शाहको उक्साहटमा भएको सफ्ट कु भएको समेत दाबी गरेका छन्।

चैत २२, २०८१ शुक्रबार १४:११:१५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।