२० जनालाई गोली लाग्दा समेत गृहमन्त्रीको उही रटान- तीनकुनेमा प्रहरीले अत्यन्त संयमता अपनायो

काठमाडौं : गृह मन्त्री रमेश लेखकले चैत १५ गते तीनकुनेमा भएको प्रदर्शनमा सुरक्षाकर्मीले अत्यन्त संयमता अपनाएको दाबी गरेका छन्।

राज्य व्यवस्था तथा सुशासन समितिको बैठकमा उपस्थित भएका मन्त्री लेखकले सुरक्षाकर्मीले संयमता अपनाउँदा थप क्षति हुन नपाएको दाबी गरे। प्रहरीको गोली २० जनालाई लागेको भनेर विवरण सार्वजनिक भइसक्दा समेत उनले सुरक्षाकर्मीले अत्यन्त  संयमता अपनाएको रटान लगाइरहे।

‘सुरक्षाकर्मीहरुले आफू घाइते हुँदा समेत मानवीय क्षति नहोस् भनी अत्यन्त संयमता अपनाएको कारण थप मानवीय क्षति हुन पाएन,’ उनले समिति बैठकमा भने, ‘भीडको उदण्डता र नेतृत्वकर्ताको उक्साहट हेर्दा प्रहरीले संयमता नअपनाएको भए अझै ठूलो क्षति हुने अवस्था सिर्जना हुन्थ्यो।’

पत्रकार सुरेश रजकलाई बचाउनका लागि प्रहरीले प्रयास गरे पनि नसकेको उनको दाबी छ।

करिब दुई घण्टाको प्रयासपछि भीड तितरवितर भएपछि आगो नियन्त्रणमा आएको, तर भीडको निरन्तरको आक्रमणले गर्दा समयमा नै सुरक्षाकर्मी भवनभित्र पसी खोजतलास र उद्धार गर्नसक्ने अवस्था भएन। जसको कारण भवनभित्र फसेका पत्रकारलाई जीवितै उद्धार गर्न सकिएन।

यद्यपि उनका सहकर्मी र प्रत्यक्षदर्शी भने भवनभित्र मान्छे छ भनेर जानकारी गराउँदा समेत प्रहरीले बचाउन प्रयास नगरेको बताउँछन्।

चैत २२, २०८१ शुक्रबार १३:३९:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।