आयोजकले ‘अगाडि बढ्नुस्, कब्जा गर्नुस्’ भनेपछि भीड उत्तेजित भएको गृहमन्त्रीको दाबी

काठमाडौं : गृह मन्त्री रमेश लेखकले चैत १५ गते तीनकुनेमा राजावादीहरूले गरेको प्रदर्शनको उदेश्य संविधान उल्ट्याउने र व्यवस्थालाई समाप्त पार्ने भएको बताएका छन्।

राज्य व्यवस्था तथा सुशासन समितिको बैठकमा उपस्थित भएका मन्त्री लेखकले राजनीतिक भेला र शान्तिपूर्ण रुपमा भएका आन्दोलनलाई सरकारले स्वीकार गरे पनि नियोजित रुपमा अराजकता फैलाउने, आपराधिक तथा विध्वंश मच्चाउने कार्यमा सरकारले टुलुटुलु हेरेर नबस्ने समेत बताए।

‘फागुन ७ गतेको प्रदर्शन, २५ गतेको स्वागतका नाममा भएको भीड जम्मापछि राजावादीहरुको उक्साहट र अभिव्यक्ति अराजक थिए,’ उनले भने, ‘आन्दोलनको उदेश्य नै संविधान उल्ट्याउने र व्यवस्थालाई नै समाप्त पार्ने थियो।’

मन्त्री लेखकले नागरिक अधिकारको दुरुपयोग गर्दै व्यक्तिगत सम्पत्ति, सञ्चार गृह, राजनीतिक दलका कार्यालय तोडफोड, सरकारी सवारी साधनमा आजगनी गर्नेहरू कुनै राजनीतिक दर्शनबाट प्रेरित हुन नसक्ने बताए।

उनले भने, ‘अराजक शैलीमा भएको लुटपाट, तोडफोड र आगजनी तथा सुरक्षाकर्मीमाथि गाडी गुडाउने सम्मको अवस्था क्षम्य हुन सक्दैन।’

आयोजकले शान्तिपूर्ण प्रदर्शन गर्ने भनिएपछि तीनकुनेमा प्रदर्शनका लागि स्थान दिइएको मन्त्री लेखकले बताए। दुर्गा प्रसाईंले प्रहरीको ब्यारिकेड तोडेपछि माहोल बिग्रिएको उनको भनाइ छ।

‘सुरक्षाकर्मीलाई किच्ने नियतका साथ गाडी हाँकेपछि माहोल बिग्रने स्थिति बन्यो। लगत्तै उत्तेजित भीडले सुरक्षाकर्मीमाथि ढुंगामुढा र सिसाका बोत्तल लगायतका वस्तु प्रहार गर्ने कामहरु भए।’

मञ्चमा भएका आयोजकमध्येका केहीले संसद भवनतर्फ देखाउँदै अगाडि बढ्नुस्, कब्जा गर्नुस् भनेपछि भीड उत्तेजित भएको मन्त्री लेखकको दाबी छ।

त्यसपछि मात्रै उत्तेजित भीडले विभिन्न ठाउँमा आगजनी र तोडफोड गरेको उनको भनाइ छ। घरमाथि मानिस छ भन्ने थाहा पाउँदा पाउँदै आगो लगाउने अवस्था आएको उनले बताए।

चैत २२, २०८१ शुक्रबार १३:१३:१८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।