बलिउड अभिनेता मनोज कुमारको निधन

एजेन्सी : बलिउड अभिनेता मनोज कुमारको निधन भएको छ। शुक्रबार बिहान मुम्बईको कोकिलाबेन अस्पतालमा ८७ वर्षको उमेरमा उनको निधन भएको हो।

देशभक्तिपूर्ण चलचित्रहरूका लागि परिचित मनोज कुमारलाई भरत कुमार उपनामले पनि चिनिन्थ्यो। उपकार, पूर्वपश्चिम, क्रान्ति, रोटी-कपडा र मकान उनका सफल फिल्म हुन्।

मनोज कुमारले सात वटा फिल्मफेयर अवार्ड प्राप्त गरेका छन्। पहिलो फिल्मफेयर अवार्ड १९६८ मा फिल्म उपकारको लागि प्राप्त भएको थियो।

उपकारले सर्वश्रेष्ठ चलचित्र, सर्वश्रेष्ठ निर्देशक, सर्वश्रेष्ठ कथा र सर्वश्रेष्ठ संवादको लागि चार फिल्मफेयर पुरस्कार जित्यो।

१९९२ मा पद्मश्रीबाट सम्मानित गरिएका उनलाई २०१६ मा उनलाई दादासाहेब फाल्के पुरस्कारबाट सम्मानित गरिएको थियो।

मनोजले लालबहादुर शास्त्रीको अनुरोधमा उपकार (१९६७) फिल्म बनाए पनि यो फिल्म शास्त्रीले हेर्न सकेनन्। किनकी उनको निधन फिल्म प्रदर्शनमा आउनुभन्दा एक वर्षअघि भएको थियो।

मनोज कुमारको वास्तविक नाम हरिकृष्ण गोस्वामी हो। उनको जन्म २४ जुलाई १९३७ मा ब्रिटिश भारतको एबटाबाद (अहिले खैबर पख्तूनख्वा, पाकिस्तान) मा भएको थियो। एबोटाबाद त्यही ठाउँ हो जहाँ अमेरिकाले २ मे २०११ मा ओसामा बिन लादेनलाई मारेको थियो।

चैत २२, २०८१ शुक्रबार ०८:१८:५५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।