काठमाडौं महानगरमा मेयर बालेन विरुद्ध विद्रोह, उप-मेयर र कर्मचारी मिलेर प्रशासकीय अधिकृतलाई गराए हाजिर

काठमाडौं : बिहीबार विहानै काठमाडौं महानगरपालिकाको नगर प्रहरी बलमा मेयर बालेन शाहको सचिवालयबाट निर्देशन जान्छ -‘सरोज गुरागाईँ (प्रमुख प्रशासकीय अधिकृत) आउँदैछन्, प्रवेश गर्न नदिनू।’

आदेश अनुसार नै नगर प्रहरी प्रमुख राजु पाण्डेले नगर प्रहरी तैनाथ गर्छन्- कार्यालय परिसरदेखि माथि कार्यकक्षसम्म। विहान १० बजेअघि नै नगर प्रहरीले कार्यालय भरिभराउ भइसकेको थियो।

तर, प्रशासकीय अधिकृत गुरागाईंलाई जसरी पनि कार्यालय छिराउन भनेर उपप्रमुख सुनिता डंगोल, वडाध्यक्षहरु र कर्मचारी युनियनका नेताहरू सक्रिय थिए। उनीहरू पनि काठमाडौं प्लाजामा रहेको महानगरको कार्यालय परिसर पुगे।

उनीहरू प्रशासकीय अधिकृतको स्वागतका लागि त्यहाँ उभिएका थिए। तीन महिनादेखि तलब नपाएका केही कर्मचारी पनि त्यही आएर जसरी पनि प्रशासकीय अधिकृतलाई हाजिर गराउने पक्षमा थिए। नगर प्रहरीले पनि तीन महिनादेखि तलब पाएका थिएनन्। तर बालेन प्रिय राजु पाण्डे चेनअफ कमाण्ड मान्ने भन्दै गुरागाईँलाई रोक्न खटिए।

गुरागाईंलाई ल्याउनका लागि अधिकृतले प्रयोग गर्ने सरकारी गाडी प्रयोग गर्ने तयारी भए पनि नगर प्रहरीले त्यसमा ह्विल लक लगाएपछि त्यहाँ भएका अन्य जनप्रतिनिधि र कर्मचारीले गुरागाईंलाई अर्कै गाडीमा ल्याउने तयारी गरे।

१० बजेदेखि नै गुरागाईंको पर्खाइमा रहेको कर्मचारी र वडाध्यक्षहरुले त्यसबीचमा सानो कार्यक्रम राखेर आफ्ना कुरा राख्न भ्याए। उनीहरूले सामाजिक सञ्जालबाट महानगर नचल्ने भन्दै समस्या समाधानका लागि नगर प्रमुख बालेन्द्र शाहसँग आग्रह गरे।

यसबीचमा केही वडाध्यक्षले प्रशासकीय अधिकृतलाई रोक्न तैनाथ नगर प्रहरीलाई कारबाही गर्ने भनेर चेतावनी दिन भ्याइसकेका थिए। वडा नम्बर २२ का वडाध्यक्ष चिनीकाजी महर्जन र वडा नम्बर ८ का वडाध्यक्ष आसमान संगतले नगर प्रहरीलाई बैठकबाट कारबाही गने चेतावनी नै दिए। 

कर्मचारी र वडाध्यक्षले भाषण गर्दै गर्दा प्रशासकीय अधिकृत गुरागाईँ कार्यालय प्रवेश गरे। उनी आएसँगै नगर प्रहरी अलर्टमा बस्यो भने वडाध्यक्ष र कर्मचारी उत्साहित बने। नगर प्रहरीलाई पन्छाउँदै गुरागाईंलाई वडाध्यक्ष र कर्मचारीले टोलीले उनको कार्यकक्ष नजिकैको सभाहलमा लग्यो।

त्यो समयमा वडाध्यक्ष र कर्मचारीको साथमा उपप्रमुख सुनिता डंगोल पनि थिइन्। केही कर्मचारी प्रशासकीय अधिकृतको कार्यकक्षमा रहेको ताला तोड्न लागे भने उपप्रमुखसहित गुरागाईँ र वडाध्यक्षहरु भने बैठक बस्न लागे।

बैठक बस्दै गर्दा यता केही कर्मचारीले प्रशासकीय अधिकृतको कार्यकक्षको ढोकाको सिसा फुटाए। उनीहरूले मार्तोल लिन जाँदा त्यहाँ नगर प्रहरी प्रमुख राजु पाण्डेको नेतृत्वमा टोली आयो। टोलीले त्यहाँ कर्मचारीहरूलाई आउन दिएनन्।

त्यस क्रममा उनी कर्मचारीहरूमाथि नै आक्रोशित भए। कर्मचारीहरूले नियमित आफ्नो काम गर्नुपर्नेमा अनावश्यक राजनीतिमा लागेको आरोप लगाए। कर्मचारीहरू आक्रमणमा उत्रिएको आरोप लगाएका उनी वडाध्यक्षहरूप्रति भने नरम सुनिए।

प्रशासकीय अधिकृतको कार्यकक्ष अगाडि बसेका नगर प्रहरीको टोली केही समयमा त्यहाँबाट निस्किएर गयो। नगर प्रहरी निस्किएपछि आधा खोल्न बाँकी रहेको ढोका जबर्जस्ती फुटाइयो।

उता बैठकमा उपप्रमुख सुनिता डंगोलले प्रमुख प्रशासकीय अधिकृतलाई मन्त्रालयले पठाएपछि हाजिर गर्न आउँदा झडपको अवस्था आउनु राम्रो नभएको भन्दै मेयर बालेनलाई कोठामा बसेर रोक्न आदेश नदिन आग्रह गरिन्।

‘यो तमासा हामीले हेर्नुपर्ने? मेयरको आदेश हो भने मेयर अघि आउनुपर्छ। होइन भने कोठामा बसेर आदेश दिन पाइँदैन,’ उनले भनिन्, ‘पहिला आजको विषय समाधान गर्छौँ। त्यसपछि बोर्ड बैठक बस्छौँ। आजका लागि यो समस्या समाधान गर्नुपर्छ।’

बैठकमा उनको भनाइलाई सबैले साथ दिए। बैठकपछि सञ्चारकर्मीले उनलाई केही प्रश्न गरे पनि जवाफ दिइनन्। त्यसपछि महानगरका प्रवक्ता नविन मानन्धरले गुरागाईंले पदबहाली गरेको जानकारी दिए।

‘उहाँले आज पद बहाली गरिसक्नुभएको छ। आम नागरिकले अब सेवासुविधा पाउँछन्,’ उनले भने, ‘भोलिको दिनबाट काठमाडौं महानगरका कर्मचारीलाई सहज ढंगले सेवा दिनुहुने अपेक्षा गरेका छौं।’

केही सञ्चारमाध्यमले सोही बैठकलाई कार्यपालिका बैठक भनेर दाबी गरे पनि उनले त्यसलाई ठाडै अस्वीकार गरे। उनले कार्यपालिका बैठक प्रमुखसहित बस्ने भन्दै झडपको अवस्था आएकोमा खेद प्रकट गरे।

त्यतिबेलासम्म आफ्नो कार्यकक्षमा प्रवेश गर्न नपाएका गुरागाईंले महानगरका शिक्षक र कर्मचारीको तलब पाउने बताए। धेरै लामो बोल्न नचाहेका उनलाई ‘काठमाडौं महानगरका शिक्षक कर्मचारीले अब त तलब पाउँछन् होला है?’ भनेर सञ्चारकर्मीले सोधेको प्रश्नमा उनले भने, ‘पाउनुपर्ने हो।’

त्यसको केही समयपछि गुरागाईंले हाजिर गरेर महानगरको वन तथा वातावरण विभागको गाडी चढेर मन्त्रालय फर्किए।

चैत २१, २०८१ बिहीबार १४:४७:०७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।