सरोज गुरागाईंलाई प्रश्न- ‘अब महानगरका शिक्षक र कर्मचारीले तलब पाउँछन्?’

काठमाडौं : काठमाडौं महानगरपालिकाका प्रमुख कार्यकारी अधिकृत सरोज गुरागाईं आजबाट कार्यालय फर्किएका छन्।

३ महिना १४ दिनपछि उपप्रमुखसहित वडाध्यक्ष र कर्मचारीहरू जबरजस्तीले कार्यालय प्रवेश गराएपछि उनले आज पदबहाली गरेका हुन्।

उनी फर्किएपछि उपप्रमुखको नेतृत्वमा बसेको बैठकले उनलाई स्वागत गरेको थियो। 

बैठकपछि महानगरका प्रवक्ता नवीन मानन्धरले गुरागाईंले पदबहाली गरेको भन्दै भोलिका दिनबाट महानगरको सेवा सहज ढंगले अघि बढ्ने दाबी गरे।

‘उहाँले आज पदबहाली गरिसक्नुभएको छ। आम नागरिकले अब सेवासुविधा पाउँछ,’ उनले भने, ‘भोलिको दिनबाट काठमाडौं महागनरका कर्मचारीलाई सहज ढंगले सेवा दिनुहुने अपेक्षा गरेका छौं।’

त्यस्तै आजबाट पदबहाली गरेका गुरागाईंले महानगरका कर्मचारी र शिक्षकले तलब पाउनुपर्ने बताए।

‘काठमाडौं महानगरका शिक्षक कर्मचारीले अब त तलब पाउँछन् होला है?’ भनेर सञ्चारकर्मीले सोधेको प्रश्नमा उनले भने, ‘पाउनुपर्ने हो।’

त्यसबाहेक उनले थप केही बोल्न चाहेनन्। उनले आफ्ना कुरा पछि राख्ने भन्दै पन्छिए।

प्रमुख प्रशासकीय अधिकृतको लफडाका कारण महानगरका कर्मचारीले तीन महिनादेखि तलब खान पाएका छैनन्।

चैत २१, २०८१ बिहीबार १३:५१:२६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।