महानगरको प्रवक्ताले भने, ‘प्रशासकीय अधिकृतले पदबहाली गर्नुभो, कार्यपालिका बैठक प्रमुखसहित बस्छ’

काठमाडौं : काठमाडौं महानगरपालिकाका प्रवक्ता नवीन मानन्धरले प्रमुख प्रशासकीय अधिकृत सरोज गुरागाईंले पदबहाली गरेको बताएका छन्।

उपप्रमुखको नेतृत्वमा बसेको बैठकपछि सञ्चारकर्मीसँग कुराकानी गर्दै उनले भोलिका दिनबाट नागरिकले सहज ढंगले सेवा पाउने बताएका हुन्।

‘उहाँले आज पदबहाली गरिसक्नुभएको छ। आम नागरिकले अब सेवासुविधा पाउँछ,’ उनले भने, ‘भोलिको दिनबाट काठमाडौं महागनरका कर्मचारीलाई सहज ढंगले सेवा दिनुहुने अपेक्षा गरेका छौं।’

साथै उनले अहिले बसेको बैठक कार्यपालिका बैठक नभएको समेत बताए।

‘यो कार्यपालिका बैठक होइन,’ उनले भने, ‘कार्यपालिका बैठक प्रमुखसहित बस्छ।’

आजको उपप्रमुखको नेतृत्वमा बसेको बैठकले जबरजस्ती पदबहाली गर्नुपर्ने अवस्था आएकोमा बैठकले खेद प्रकट समेत गरेको छ।

प्रवक्ता मानन्धरले नगरप्रहरी गइसकेकाले वातावरण सहज भइसकेको र भोलिबाट नियमित काम अघि बढ्ने बताए।

यद्यपि यो समाचार तयार पार्दासम्म पनि गुरागाईं आफ्नो कक्षमा प्रवेश गरेका छैनन्।

चैत २१, २०८१ बिहीबार १३:०४:१४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।