नगर प्रहरीको अवरोधबीच सरोज गुरागाईं महानगरमा प्रवेश

काठमाडौं : काठमाडौं महानगरपालिकाका प्रमुख प्रशासकीय अधिकृत सरोज गुरागाईं महानगरपालिका परिसस प्रवेश गरेका छन्।

नगर प्रहरीको अवरोधका बीच वडाध्यक्ष र कर्मचारीहरुले उनलाई पेलेरै कार्यालय परिसरभित्र प्रवेश गराएका हुन्। नगर प्रहरीले अवरोध गरे पछि उनीहरुले त्यसलाई पन्छाएर पेलेरै कार्यकक्षमा प्रवेश गरेका हुन्।

गुरागाई निलम्बनमा छन्। पुरानो बसपार्कमा काठमाडौं टावरको नक्सा नियमविपरीत पास गर्ने प्रक्रिया अगाडि बढाएपछि गुरागाईंलाई महानगरले जिम्मेवारीबाट हटाएको  थियो।

उनलाई निलम्बन गरेपछि महानगरले आफूलाई नयाँ प्रशासकीय अधिकृत दिन बारम्बार संघीय सरकारसँग माग गर्दै आएको छ। महानगरका मेयर बालेन शाहले नयाँ प्रशासकीय अधिकृत चाहियो भन्दै सामाजिक सञ्जालमा स्टाटस लेख्दै आएका  छन्।

कर्मचारीहरूले कार्यपालिकाका वडा अध्यक्ष, सदस्य र उपमेयर आफ्नो पक्षमा रहेको दावी गरेका छन्। उनीहरूले प्रशासकीय अधिकृतलाई आजै हाजिर गराए रोकिएको सबै तलब निकासा हुने उल्लेख गरे। लामो समयदेखि तलब नपाएपछि आन्दोलनमा उत्रिनु आफूहरूको बाध्यता रहेको उनीहरूको भनाइ छ। 

प्रशासकीय अधिकृत निलम्बनमा परेपछि महानगरको काम कारवाही ठप्प भएको छ।

चैत २१, २०८१ बिहीबार १२:०१:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।