प्रमुख प्रशासकीय अधिकृत गुरागाईंलाई रोक्न महानगर प्रहरी परिचालन, रोक्ने प्रहरीलाई बैठकबाट कारबाही गर्ने वडाध्यक्षको धम्की

काठमाडौं : वडाध्यक्ष र कर्मचारीहरूले काठमाडौं महानगरपालिकाका प्रमुख प्रशासकीय अधिकृत सरोज गुरागाईं हाजिर गराउने तयारी गरेपछि मेयर बालेन शाहले महानगर प्रहरी परिचालन गरेका छन्।

कमलादीस्थित काठमाडौं महानगरको कार्यालयमा एकातिर कर्मचारीहरू सबै वडाबाट जम्मा भएर प्रमुख प्रशासकीय अधिकृतको स्वागतका लागि बसेका छन् भने अर्कोतर्फ उनलाई रोक्न मेयरले नगर प्रहरी तैनाथ गरेका छन्।

महानगरमा कर्मचारी र नगर प्रहरीबीचमै विवादको रूप लिएको छ। पाँच महिनादेखि तलब नपाएको र महानगरको काम ठप्प भएको भन्दै कर्मचारीले नै प्रशासकीय अधिकृतलाई हाजिर गराउन खोजेका हुन्।

वडाध्यक्षहरूले रोक्ने नगर प्रहरीलाई कार्यपालिका बैठकबाट कारबाही गर्ने धम्की दिएका छन्। त्यसरी धम्की दिने वडाध्यक्षहरूमा वडा नम्बर २२ का वडाध्यक्ष चिनीकाजी महर्जन, वडा नम्बर ८ का वडाध्यक्ष आसमान संगत लगायत छन्।

काठमाडौं टावरको नक्सा पासमा अनियमितता गरेको भन्दै मेयर बालेन साहले उनलाई अघोषित निलम्बनमा राखेका थिए। उनलाई कार्यालयमा प्रवेश निषेध गरिएको थियो।

मेयर साहले गुरागाईंलाई हटाएर नयाँ प्रमुख प्रशासकीय अधिकृत ल्याउन चाहेका थिए। तर, उनीमाथिको कुनै पनि आरोप पुष्टि नभएकाले सरकार गुरागाईंलाई हटाउन तयार भएन।

चैत २१, २०८१ बिहीबार ११:२३:३७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।