सुर्खेतका लागि उडेको श्री एयरलाइन्सको विमान काठमाडौं फर्कियो

काठमाडौं : काठमाडौंबाट सुर्खेतको राजधानी वीरेन्द्रनगरका लागि उडेको श्री एयरलाइन्सको जहाज फर्किएको छ। श्री एअरलाइन्सको एन९१२३ कलसाइन भएको जहाज हिजो साँझ वीरेन्द्रनगरमा अवतरण नगरी काठमाडौं फर्काइएको हो।

बुधबार दिउँसो सवा तीन बजेका लागि तय भएको उडान निर्धारित समयभन्दा करिब दुई घण्टा ढिलो ५ बजेर ८ मिनेटमा उडान भरेको थियो। काठमाडौंबाट राम्रै किसिमले उडान भरे पनि सुर्खेत पुगेपछि भने विमान परिचारिकाले विमानमा खराबी आएको जानकारी दिएको विमानमा सवार पत्रकार देविराम देवकोटाले जानकारी दिए।

विमान परिचालिकाले बोलेको कुरा उद्धृत गर्दै देवकोटाले भने, ‘विमानमा सामान्य खराबी देखिएको छ, क्याप्टेनले जोखिम लिन चाहनुभएन, त्यसैले हामी फेरि काठमाडौंतिर फर्कंदैछौं।’

प्लेनमा ५९ जना यात्रु, २ जना क्याप्टेन र २ जना एयर होस्टेस सहित ६३ सवार थिए। विमान काठमाडौं फर्किँदा यहाँ नेपाली सेना, नेपाल प्रहरी, दमकल, र एम्बुलेन्सहरू तयारी अवस्थामा राखिएको पत्रकार देवकोटाले जानकारी दिए।

उनले भने, ‘जब हामी विमानबाट ओर्लियौं, एयरपोर्टको दृश्य अचम्मको थियो। आर्मी, प्रहरी, दमकल, र एम्बुलेन्सहरू तयारी अवस्थामा देख्दा सामान्य प्राविधिक गडबडी मात्र थिएन भन्ने कुरा तथ यसै थाहा भइहाल्यो नि!’

यता श्री एयरलाइन्सले भने सामान्य प्राविधिक समस्या देखिएको र यात्रुलाई रिक्समा राख्न नचाहेकाले काठमाडौं फर्काइएको उकेरासँगको कुराकानीमा बतायो।

‘विमानमा सामान्य प्राविधिक समस्या आएको हो। यात्रुको सुरक्षा नै हाम्रो पहिलो प्राथमिकता हो। त्यसैले पनि हामीले कुनै रिक्स नलिई विमान काठमाडौं फर्कायौं। इन्जिनियरहरुको सबै टोली यतै हुनुहुन्छ’, एयरलाइन्सको प्रवक्ता अनिल मानन्धरले भने।

बुधबार वीरेन्द्रनगर उड्ने श्री एयरलाइन्सको उक्त विमान नै अन्तिम भएकाले आज विहानको विमानमार्फत उनीहरुलाई सुर्खेत पठाइएको उनले बताए। त्यसका अलावा रिफन्ड माग्नेहरुको पनि रकम फिर्ता गरिएको उनको भनाइ छ।

चैत २१, २०८१ बिहीबार १०:४९:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।