अल्टिमेटमदेखि अकुपाइ नारायणहिटीसम्मको कार्यक्रम अब घोषणा हुन्छ : प्रवक्ता स्वागत नेपाल
काठमाडौं : राजसंस्था पुनर्स्थापनाका लागि संयुक्त जनआन्दोलन परिचालन समितिले अल्टिमेटमदेखि अकुपाइ नारायणहिटीसम्मका आन्दोलनका कार्यक्रम घोषणा गरिने जनाएको छ।
समितिका प्रवक्ता स्वागत नेपालले एक विज्ञप्ति निकालेर अहिलेसम्म आन्दोलन नै घोषणा नभएको र अब जनआन्दोलनका चरणबद्ध कार्यक्रमहरू प्रचारात्मकदेखि अल्टिमेटम हुँदै अनिश्चितकालीन आमहडताल र अकुपाइ नारायणहिटीसम्म घोषणा गरिने जानकारी दिए।
आन्दोलन कमजोर बनेको भन्ने भाष्य सिर्जना गर्न खोजिएकोमा असन्तुष्टि व्यक्त गर्दै समितिले शुरु नै नभएको आन्दोलन कमजोर हुने भन्ने प्रश्नै नउठ्ने समेत बताए।
आन्दोलनका कार्यक्रम घोषणा नै नभई आत्तिएको सरकारले आफ्नो सबै शक्ति प्रयोग गरी आफ्ना अपराधहरू लुकाउन षडयन्त्रपूर्वक दोष अन्यत्र थोपर्दै दमनको नीतिमा उत्रिइसकेको समितिको निष्कर्ष छ।
प्रवक्ता नेपालले समितिका सबै आन्दोलन शान्तिपूर्ण हुने भन्दै शान्तिपूर्ण आन्दोलनमा दमन भए स्वभाविक रुपमा प्रतिरोधमा उत्रने बताए।
यसका साथै समितिले आन्दोलनलाई सुसंस्कृत, शान्तिपूर्ण र दमनविरुद्ध प्रभावकारी बनाउनका लागि भन्दै सबै जिल्लामा परिचालन समिति र विभिन्न देशमा जनआन्दोलन समर्थन समितिहरू गठन गर्ने भएको छ।
त्यसका लागि इच्छुक नेपाली नागरिकहरूले विस्तृत विवरण उपलब्ध गराइदिन समेत प्रवक्ता नेपालले विज्ञप्तिमार्फत उल्लेख गरेका छन्।
‘राजसंस्थावादी, देशभक्त, राष्ट्रवादी, निरंकुशताविरोधी, अग्रगामी विचार राख्ने सबै नेपाली नागरिकहरुलाई आआफ्ना स्थानका परिचालन समिति गठन गरी जिम्मेवार भूमिकामा रहन चाहनु हुने सबैमा आफ्नो स्पष्ट खुल्ने परिचय सहित नाम, ठेगाना, उमेर, पेशा र सम्पर्क नम्बर तथा इमेल आइडी उपलब्ध गराइदिनु हुन अनुरोध गर्दछौं। तत्कालका लागि मोबाइल नम्बर ९८५१०१७७१० को ह्वाटसएपमा आफ्नो विवरण पठाइदिनु हुन पनि अनुरोध गर्दछौँ।’
यसरी विवरण पठाउनेहरु नै जिल्लामा हुने आन्दोलनको जिम्मेवारी सम्हाल्ने बताइएको छ। त्यसपछि सबै पालिका र वडामा समेत अन्य समिति र उपसमितिहरु गठन गरिने प्रवक्ता नेपालले बताए।
चैत २१, २०८१ बिहीबार ०९:३८:२६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
