ट्रम्पले कर घोषणा गरेपछि बोले साझेदार देशका नेता, विश्व व्यापार संगठनको सहारा लिने चेतावनी

एजेन्सी : अमेरिकी राष्ट्रपति ट्रम्पले करको घोषणा गरेपछि धेरै देशका नेताहरूले आ-आफ्नो प्रतिक्रिया दिएका छन्।

स्वीडेनका प्रधानमन्त्री उल्फ क्रिस्टरसनले आफूहरूले व्यापार युद्ध नचाहेको भन्दै अमेरिकासँग व्यापार र सहयोगको बाटोमा फर्कन चाहेको बताएका छन्।

यसैबीच, दक्षिण कोरियाका कार्यवाहक राष्ट्रपति हान डक-सूले विश्वव्यापी व्यापार युद्धको वास्तविकता स्वीकार गर्दै सरकारले यस व्यापार संकटको सामना गर्न आफ्नो सबै क्षमता प्रयोग गर्नुपर्ने बताए।

कोलम्बियाली विदेशमन्त्री लौरा साराबियाले यसबाट देशका उद्योग र निर्यातकर्ताहरूलाई सुरक्षित राख्नका लागि हेरिरहेको बताएकी छन्।

त्यसैगरी ब्राजिल सरकारले द्विपक्षीय व्यापारमा पारस्परिकता सुनिश्चित गर्न सबै सम्भावित कदमहरूको मूल्याङ्कन गरिरहेको विज्ञप्तिमार्फत जनाएको छ। उसले वैध राष्ट्रिय हितहरूको रक्षा गर्न विश्व व्यापार संगठनको सहारा लिने भनेको छ।

अमेरिकाले दक्षिण कोरियामा २५ प्रतिशत तथा कोलम्बिया र ब्राजिलमा १० प्रतिशत भन्सार कर लगाएको छ।

यसैबीच, अष्ट्रेलियाका प्रधानमन्त्री एन्थोनी अल्बानीजले करहरू अप्रत्याशित नभए पनि पूर्ण रूपमा अनुचित भने भएको बताएकको छ।

उनले भने, ‘ट्यारिफ घोषणा गर्नुको पछाडि कुनै तर्क छैन। तिनीहरू अष्ट्रेलिया र अमेरिका बीचको साझेदारीको विरुद्धमा छन्। यो कुनै साथीको काम होइन।’

चैत २१, २०८१ बिहीबार ०९:१९:५३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।