काठमाडौंमा वायु प्रदूषण ‘घातक’ तहमा, अत्यावश्यक काम नपरी घरबाहिर ननिस्कन मन्त्रालयको आग्रह

काठमाडौं : काठमाडौं उपत्यकामा प्रदूषणको तह ‘घातक’मा पुगेको छ। बिहीबार विहानको तथ्यांकअनुसार काठमाडौंको वायुको गुणस्तर सूचकांक तीन सय ५२ पुगेको छ, जुन घातक श्रेणी हो।

यो मापन विहान सात बजेर २० मिनेट जाँदाको हो। लामो समयदेखि पानी नपर्दा काठमाडौंको आकाशमा थुप्रिएको धुलो र उपत्यका आसपासका विभिन्न जंगलमा लागेको डढेलोको धुवाँको कारण काठमाडौं उपत्यकामा वायु प्रदूषणको मात्र उच्च हुँदै गएको हो।

नेपालमा अहिले भइरहेको वायु प्रदूषणमा घरबाहिर ननिस्कन आग्रह गरेको छ।

यति हुँदा पनि नेपाल दोस्रो स्थानमा छ। पहिलो स्थानमा इराकको राजधानी बगदाद रहेको छ। बगदादमा अहिलेको वायु प्रदूषण सूचकांक ११०१ छ। जुन अन्यन्त घातक हो।

हावाको गुणस्तर अनुसार ०-५० सम्म ‘स्वस्थकर’, ५१-१०० सम्म ‘मध्यम’, १०१-१५० सम्म फोक्सोका विरामी जेष्ठ नागरिक र बालबालिकाहरूका लागि हानिकारक र १५१-२०० सम्म सबै समूहका लागि अस्वस्थकर, २०१-३०० सम्म ‘धेरै अस्वस्थकर’ र सो भन्दा माथि ‘खतराजनक’ मानिन्छ।

वायु प्रदूषणले मुटु, रक्तनली, फोक्सो, मस्तिष्क, आँखा, नाक, कान र घाँटी लगायतका अंगहरूमा गम्भीर असर पार्नुका साथै दम, क्यान्सर जस्ता नसर्ने तथा दीर्घ रोगहरूको जोखिम समेत बढाउँछ।

नेपालमा वायु प्रदूषणका कारण हरेक वर्ष हुने मृत्युमा विशेषगरी पाँच वर्ष मुनिका बालबालिका, गर्भवती महिला, दीर्घरोगी, र जेष्ठ नागरिकहरू बढी जोखिममा पर्ने गरेको भएकाले यसबाट बच्न अनावश्यक यात्रा र बिहान नहिँड्न तथा हिँडनै परे अनिवार्य रूपमा मास्क लगाउन र अत्यधिक प्रदूषित क्षेत्रहरूबाट टाढा रहन मन्त्रालयले अनुरोध गरेको छ।

चैत २१, २०८१ बिहीबार ०७:३५:१७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।