तीनकुनेमा भएको बल प्रयोग : ५८ राउन्ड गोली प्रहार,  ७४६ राउन्ड अश्रु ग्यास, २० जनालाई गोली लाग्यो

काठमाडौँ : नेपाल प्रहरीले चैत १५ मा तीनकुनेमा भएको राजावादी समूहको विरोध प्रदर्शनमा भएको बल प्रयोगको विवरण सार्वजनिक गर्यो। बुधवार प्रहरी प्रवक्ता दिनेश आचार्यले सार्वजनिक गरेको विवरणमा सो दिन प्रहरीले ५८ राउन्ड गोली प्रहार गरेको थियो। 

भिड नियन्त्रणका लागि ७ सय ४६ सेल अश्रुग्याँस प्रहार भएको र भिडलाई तितरबितर गर्न  १९२ पटक ब्ल्यांक फायर गरेको उनले सार्वजनिक गरे। ब्ल्यांक फायरमा गोली चलेको जस्तो आवाज आए पनि गोली भने राखिएको हुन्न।  डिआइजी आचार्यले अराजक भिडलाई नियन्त्रणमा लिन गोली चलाउनु परेको बताए।

यस अगाडि प्रहरीले घाइतेको सङ्ख्या सार्वजनिक गरे पनि को कसरी घाइते भएको खुलाएको थिएन। प्रहरीले चैत १५ गतेकै दिन ५१ जना प्रदर्शनकारी घाइते भएको सार्वजनिक गरेको थियो। बुधवार आचार्यले घाइतेमध्ये २० जनालाई गोली लागेको जानकारी दिए। त्यसमा दुई जना महिला र १८ जना पुरुष छन्। गोली लागेर एक जनाको मृत्यु भयो। अन्य १३ जना उपचारकोक्रममा रहेका छन्। 

चैत २०, २०८१ बुधबार १९:५१:२५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।