तीनकुने झडपबारे प्रहरीको दाबी : मञ्चमा राष्ट्रगान बजेको छैन, नियोजित रूपमा अश्रुग्याँस हानेको हैन

काठमाडौं : नेपाल प्रहरीका प्रवक्ता दिनेश आचार्यले चैत १५ मा तीनकुनेमा आयोजित विरोध प्रदर्शनको मञ्चमा अश्रुग्याँस पुग्नु नियोजित नभएको दाबी गरे। बुधवार प्रहरी प्रधान कार्यालयमा आयोजित पत्रकार सम्मेलनमा उनले  औपचारिक रूपमा कार्यक्रम सुरु नहुँदै मञ्चमा प्रहरीको अश्रुग्याँस पुगेको स्वीकार गरे।

औपचारिक कार्यक्रम सुरु हुनुभन्दा अगाडि नै मञ्चमा अन्य व्यक्तिहरू गएर ‘यहाँ बस्ने हैन, हान्न जाने हो’ भनेर प्रदर्शनकारीलाई भड्काएको बताउँदै उनले भने ‘एक ठाउँमा हानेको अश्रुग्याँस कहिलेकाहीँ अन्त पनि जान सक्छ। एंगल नमिल्न सक्छ। तर इन्टेनसन रूपमा कार्यक्रमस्थलमा अश्रुग्याँस हानेको हैन’ उनले भने।

आचार्यले सो दिन मञ्चमा कुनै राष्ट्रगान नबजेको र राष्ट्रगान बजेको भिडियो क्लिपहरू ‘डिपफेक भएको दाबी गरे। उनले झडपस्थलमा प्रयोग गर्ने म्याद सकिएको अश्रुग्याँस हानेकोबारे प्रस्ट जवाफ दिएनन्। प्रहरीसँग अश्रुग्याँस पर्याप्त रहेको र केही किन्ने प्रक्रियामा रहेको मात्र बताए।

चैत २०, २०८१ बुधबार १९:११:२२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।