प्रहरीले सार्वजनिक गर्यो तीनकुने झडपको टाइमलाइन : १२ : ४५ मा झडप सुरु, तीन बजे पहिलो पटक गोली प्रहार
काठमाडौं : चैत १५ गते तीनकुनेमा राजावादी समूहले आयोजना गरेको विरोध प्रदर्शनमा सुरक्षा संगठनबाट अत्यधिक बल प्रयोग गरेको भन्दै आलोचना बढेपछि प्रहरीले पत्रकार सम्मेलन आयोजना गरेर आन्दोलनको दिनको टाइमलाइन सार्वजनिक गर्यो।
घटनाबारे मिडिया र सामाजिक सञ्जालबाट भ्रम छर्ने प्रयास भएको दाबी गर्दै केन्द्रीय प्रहरी प्रवक्ता दिनेश आचार्यले विभिन्न मिडियाका भिडियो र प्रहरीको क्लोज सर्किट टेलिभिजनको दृश्यको आधारमा घटनाको दिन तीनकुने क्षेत्रमा के भएको थियो भन्ने दाबी सार्वजनिक गरेका थिए।
प्रहरीले सार्वजनिक गरेको भिडियोमा प्रारम्भमा प्रदर्शनकारी भेला भएको, मञ्चमा वक्ताहरूले गरेको उत्तेजित भाषण, दुर्गा प्रसाईँले गाडी चलाएर निषेधित क्षेत्र तोडेको, मञ्चमा प्रसाईँले अब संसद् भवन कब्जा गर्छौँ’ भनेको क्लिप, रवीन्द्र मिश्रले तपाईँहरूको कमान्डर यहाँ सुरक्षित हुनुहुन्छ अगाडि बढ्नोस्, टुलुटुलु हेरेर बस्ने हैन’ भनेको भिडियो क्लिपहरू सार्वजनिक गरेको थियो।
आगलागी भएको तीनकुनेको घरमा प्रारम्भमा भएको ढुंगामुढा, प्रहरीसँग भएको झडप, प्रहरीबाट अश्रुग्याँस प्रहार, पानीको फोहरा हानेको दृष्यहरुलाई पत्रकार सम्मेलनमा प्राथमिकता दिएर देखाइएको थियो।
प्रवक्ता आचार्यले पूर्वराजाका समर्थकहरूले जडीबुटीलगायत क्षेत्रमा भेला भएर तीनकुनेमा प्रदर्शन गर्न पूर्वस्वीकृति लिएको र जिल्ला सुरक्षा समितिले आवश्यक सुरक्षा व्यवस्था मिलाएको जानकारी दिए। राजनीतिक कार्यक्रम भनेर अनुमति लिए पनि उत्तेजक गतिविधि गरेपछि प्रहरीले बल प्रयोग गर्नुपरेको उनले दाबी थियो।
प्रहरीले सार्वजनिक गरेको घटनाको टाइमलाइन:
११:४५ देखि १२:१५ सम्म
प्रहरीले सार्वजनिक गरेको विवरण अनुसार विरोध प्रदर्शनस्थल तीनकुनेमा प्रदर्शनकारीहरु ११:४५ बजेबाट भेला हुन सुरु गरेका थिए। करिब आधा घण्टाभित्र ३ हजारदेखि ३५ सय सम्म प्रदर्शनकारी जम्मा भइसकेका थिए।
सुरुमा कार्यक्रमस्थल शान्त रहेको प्रहरीको भनाई छ। मञ्चबाट ‘नेताहरूको घर जलाउन अगाडि बढ्ने जस्ता अभिव्यक्ति दिन थालेपछि भीड अगाडि बढेको प्रहरीको दाबी छ।
लगत्तै प्रहरीसँग धक्कामुक्की सुरु भएको र प्रदर्शनकारीहरू निषेधित क्षेत्र तोड्न आएपछि प्रहरीसँग झडप सुरु भएको डिआइजी आचार्यले जानकारी दिए।
१२:५०
प्रहरीले बुधवार सार्वजनिक गरेको टाइमलाइन अनुसार पहिलो पटक १२:५० मा प्रहरीले स्थिति नियन्त्रणमा अश्रुग्याँस प्रहार गरेको थियो।
१:२३
करिब साढे एक बजे आन्दोलनका कमान्डर दुर्गा प्रसाईँको गाडी अराजक रूपमा तीनकुनेमा आएर प्रहरीलाई किच्ने गरी निषेधित क्षेत्रमा प्रवेश गरेको र प्रहरीले प्रसाईँलाई नियन्त्रणमा लिए पनि भीडले छुटाएर लगेको आचार्यले दाबी गरे। प्रसाईँ करिव तीन हजारको संख्यासहित आएको दाबी गरे।
त्यसपछि प्रसाईँ कार्यक्रमको मञ्चमा गएका थिए। मञ्चबाट प्रसाईँले र रवीन्द्र मिश्रले संसद् भवन कब्जा गर्न भिडलाई निर्देशन दिएको प्रहरीको टाइमलाइनमा उल्लेख छ।
निजी घर र मार्बल हाउसमा यही समयमा तोडफोड सुरु भएपछि प्रहरीले अश्रुग्याँस र पानीको फोहोरा प्रयोग गरेको उनले दाबी गरे।
२:२१
दुर्गा प्रसाईँ विरोध प्रदर्शनस्थलमा आएको करिब एक घण्टापछि रोयल ब्याङ्क्वेट र मार्बल हाउसमा आगजनी भएको प्रहरीको टाइम लाइनमा उल्लेख छ।
२:२५ - २:३४
करिब १० मिनेटबीचमा आगलागी भएको घरमा आगो निभाउन आएको दमकल तोडफोड भएको, अन्य स्थानमा पनि आगजनी सुरु भएको र यही समयमा अन्नपूर्ण पोस्टको कार्यालयमा तोडफोड र आगजनी भएको प्रहरीको विवरणमा उल्लेख छ।
२:५४ - ३:०९
प्रहरीले सार्वजनिक गरेको विवरणमा प्रहरीले पहिलो पटक यही समयमा गोली प्रहार गरेको थियो।
यो समयमा प्रदर्शनकारीहरूको सङ्ख्या बढेर करिब ५ हजार पुगेका थिए। अन्य प्रदर्शनकारीहरु जम्मा हुन थालेका थिए।
यही समयमा लागु औषध ब्युरोको गाडीमा आगो लगाएको र स्थिति नियन्त्रणमा लिन थप गोली प्रहार भएको आचार्यले बुधवार सार्वजनिक गरेको टाइमलाइनमा उल्लेख छ। यही समयभित्र कोटेश्वरमा रहेको भाटभटेनीमा लुटपाट भएको थियो।
३:४६ - ४:२५
त्यसपछि सिनामंगल चोक र एयरपोर्ट गेटमा प्रदर्शनकारीले आगो लगाएको, प्रदर्शनकारीले जडीबुटी चोकमा सिसिटिभी तोडफोड गरेपछि यही समयमा जिल्ला प्रशासन कार्यालयबाट कर्फ्यु आदेश जारी भएको थियो।
४:२९ - ६:११
प्रहरीले सार्वजनिक गरेको टाइमलाइन अनुसार यो समयमा बालकुमारी पुलमा सरकारी गाडीमा आगजनी भएको थियो। यही समयमा एकीकृत समाजवादीको कार्यालयमा तोडफोड र आगजनी भएको थियो।
यही समयमा सिनामंगल र जडीबुटीमा थप आगो लगाउने काम भएको थियो।
चैत २०, २०८१ बुधबार १८:४२:११ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
