पत्रकार रजकको मृत्युको कारण ‘मृत्युपछि जलेको नभई जलेर मृत्यु’, गोली लागेको देखिएन

काठमाडौं : पत्रकार सुरेश रजकको मृत्युको कारण आगोमा जल्नु देखिएको छ। पोस्टमार्टममा ‘मृत्युपछि जलेको नभई जलेर मृत्यु भएको देखिएको महाराजगन्ज चिकित्सा क्याम्पसको फरेन्सिक विभाग प्रमुख डा. गोपालकुमार चौधरीले उकेरालाई जानकारी दिए।

‘उनको शरीरमा गोली लागेको देखिएन। मृत्युको कारण पनि मृत्युपछि शव जलेको नभई जलेको कारण मृत्यु भएको देखियो’ चिकित्सक चौधरीले भने।

जलेको शवको पोस्टमार्टम गर्नु अगाडि एक्स-रे गर्नुपर्ने प्रोटोकलका कारण मंगलबार उनको शवको पोस्टमार्टम भएको थिएन। मंगलबार र बुधवार दोहोर्याएर एक्स-रे गर्दा शरीरमा गोली लागेको नदेखिएको र पोस्टमार्टममा मृत्यु कारण जल्नु नै देखिएको चिकित्सक चौधरीले बताए।

सुरेश तीनकुनेमा प्रदर्शनकारीले आगो लगाएको घरभित्र थिए। उनको शव सोही घरमा डढेको अवस्थामा फेला परेको थियो।

सुरेशको पोस्टमार्टमसँगै शुक्रवार चैत १५ को राजावादी प्रदर्शनमा मारिएका दुवै शवको पोस्टमार्टम सकिएको छ।

मंगलबार कीर्तिपुरका २९ वर्षीय सविन महर्जनको पोस्टमार्टम भएको थियो। उनको मृत्युको कारण गोलीले फोक्सो र मुटु छेडिनु देखिएको थियो।

महाराजगन्ज चिकित्सा क्याम्पसको फरेन्सिक विभागले मंगलबार गरेको पोस्टमार्टममा उनको दाहिने पाखुराबाट गोली छिरेर फोक्सो-मुटु छेड्दै देब्रे छातीबाट निस्किएको उल्लेख छ। उनको मंगलबारै दाहसंस्कार भएको थियो।

सम्बन्धित समाचार

चैत २०, २०८१ बुधबार १६:४०:४५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।