राज्य व्यवस्थाको बैठकमा प्रश्न ‘राज्यसँग ४ हजारको भिड व्यवस्थापन गर्न  क्षमता नभएको हो?’

काठमाडौं : चैत १५ को तीनकुनेमा भएको विरोध प्रदर्शनपछि उत्पन्न परिस्थितिबारे जानकारी दिन राज्य व्यवस्था तथा सुशासन समितिले गृहमन्त्री रमेश लेखकलाई समितिको बैठकमा बोलाएको छ।

समितिको बुधवारको बैठकमा सदस्यहरूले चैत १५ को प्रदर्शनमा भएको झडप, गोली प्रहार लगायतका घटनाबारे गृहमन्त्रीलाई समिति बैठकमा बोलाउन माग गरेका थिए।

सदस्यहरूको मागपछि समिति सभापति रामहरि खतिवडाले चैत २२ को बैठकमा गृहमन्त्रीलाई बोलाइने बताए।

‘१५ गतेको घटनाबारे जानकारी गराउन गृहमन्त्रीलाई  समितिले सम्पर्क गरेको छ। अब २२ गते समितिको अर्को बैठक बस्नेछ। त्यसमा तीनकुने घटनाको बारेमा यथार्थ जनताका बिचमा लाने गरी हामी गृहमन्त्रीलाई बोलाउने छौँ’ उनले भने।

समितिको बैठकमा कांग्रेसका सांसद विश्वप्रकाश शर्माले चैत १५ को  आन्दोलनका क्रममा घटेका सबै घटनाहरूको बारेमा गृहमन्त्रीले समितिलाई जानकारी गराउनुपर्ने बताएका थिए।

‘संसद्मा एउटा परम्परा छ। त्यो  परम्परा भनेको  एउटा बैठक बसे पछाडि अर्को बैठक बस्ने अवधिको बिचमा यदि मुलुकमा कुनै  प्रकारको गम्भीर प्रकृतिको घटना हुन्छ भने त्यो संसद्को गहिरो ध्यानाकर्षणको विषय बन्छ,’ उनले भने ‘संसद्मा माननीय गृहमन्त्रीज्यूले जवाफ दिनलाई अनुकूल समय विविध कारण मिलेन। पहिला द्वन्द्व थियो पछि दीपक बोहराको घटना भयो। राज्य व्यवस्था समितिको यो बैठकमा गृहमन्त्री ज्युलाई बोलाउनुपर्छ। गृहमन्त्रीले  राज्य प्रशासनको तर्फबाट राज्यको बुझाई के हो? भएको विषय वस्तु के हो? ४ हजारसम्मको भिड व्यवस्थापन गर्न  क्षमता नभएको हो राज्यसँग?  यो समग्र विषयमा समितिलाई जानकारी गराउन ध्यानाकर्षण गर्दछु।’

उनले राज्य व्यवस्था तथा सुशासन समितिको पहिलो एजेन्डा चैत १५  गतेको घटना हुनुपर्नेमा त्यसमा समितिले किन ध्यान नदिएको भन्दै प्रश्न गरेका थिए।

माओवादी केन्द्रका प्रमुख सचेतक हितराज पाण्डेले तीनकुने घटनामा सरकारले सरकारले चाँडै जवाफ दिनुपर्ने बताए। उनले प्रहरी घेरामा रहेका दुर्गा प्रसाईँलाई पक्राउ नगरिएकोप्रति आक्रोश पोखे।

‘चैत १५ गतेको घटनामा सरकारले चाँडै जवाफ दिनुपर्थ्यो। प्रधानमन्त्री नै आएर जवाफ दिनुपर्थ्यो। सरकारले गणतन्त्रको बारेमा, संविधानको रक्षाको बारेमा कुरा गर्यो। तर चैत १५ गतेको घटना के हो ? समितिमा गृहमन्त्री आउनुपर्छ, सरकारले ठिक गरेन, आफ्नै प्रहरीले घेरामा हालेको बेलामा दुर्गा प्रसाईँलाई नसमात्ने, अहिले छिटोभन्दा छिटो पक्रिन्छौँ भन्दा कसले पत्याउने?’

चैत २०, २०८१ बुधबार १६:१६:१० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।