'असफल' दुर्गेशको दामी कमब्याक : दुश्मनलाई बनाए हेरेको हेर्यै
काठमाडौँ : गीतको शब्द अनि स्वरको स्तरलाई लिएर आलोचना भइरहे पनि दुर्गेश थापाको सांगीतिक यात्रा लयमै थियो। उनी स्टेज कार्यक्रमहरूमा व्यस्त नै थिए।
जब एकाएक अभिनेता पल शाहको नाबालिग बलात्कार घटनामा उनी जोडिए उनको दुखको दीन सुरु भयो। उनी पीडितको पक्षमा थिए। जब पीडित नाबालिगसहितको एक अडियो बाहिरियो ‘पललाई फसाउन खोजेको’ भन्दै उनको फ्यानहरू पीडितसहित दुर्गेशमाथि खनिए।
उनी सहभागी सांगीतिक कार्यक्रमहरूमा ढुंगा हान्न थालियो। दुर्गेश बहिष्कार अभियानै चल्यो। अदालतमा नाबालिगको बयान नबदलिएसम्म उनी पीडितकै पक्षमा थिए। प्रहरीमा दिएको बयानमा उनले खुलेरै जानकारी दिएका थिए।
अदालतमा पीडित अनि जाहेरीकर्ताको बयान बदलियो। दुर्गेशको पनि बयान बदलियो। यो बिचमा उनले पल शाहसँग भेटेका तस्बिर पनि बाहिरिए।
घटनाक्रमले पीडितले बयान बदल्नुको कारण पल निर्दोष भएर भन्दा पनि होस्टायलको प्रभाव देखिएकै थियो। जब पीडितले नै हैन भनेपछि म मात्र किन हो भनिरहनु भन्ने लागेको हुनसक्छ दुर्गेशले पनि पल्टिमारे।
तर यसले उनको करिअरलाई लयमा फर्काएन। पलका फ्यान दुर्गेशको विपक्षमै थिए। कमसेकम दुर्गेशले त पीडितलाई साथ दिए भनेर पाएको सहानुभूति बयान बदलेर गुम्यो। उनको सांगीतिक यात्रा धर्मरायो। स्टेजहरूमा नाचिरहने दुर्गेश सिन आउट भए।
OOO
कमब्याकका लागि दुर्गेशको प्रयास जारी थियो। केही गीत निकाले पनि। तर पुरानो क्रेज फर्काउन सकेनन्। तीन महिना अगाडि उनले कमब्याकका लागि अर्को प्रयास गरे ‘दुश्मन हेरेको हेर्यै’ बोलको गीत निकाले। म्युजिक भिडियो बनाएर आफ्नै च्यानलबाट रिलिज गरे।
बिस्तारै गीतले मार्केट लिँदै गयो। म्युजिक भिडियोमा प्रियङ्का कार्कीले मुखले च्यापेको नोट दुर्गेशले मुखैले लिएको भिडियो क्लिपबाट गीतको चर्चा सुरु भएको थियो।
तीन महिनाको बिचमा गीतले सामाजिक सञ्जालमा कब्जा हान्यो। उनकै च्यानलमा पाँच करोड बढी पटक म्युजिक भिडियो हेरियो।
उनीसँगै गीतमा आनन्द कार्की, समीक्षा अधिकारी अनि एलिना चौहानको समेत स्वर छ। पल शाहलाई म्युजिक भिडियोमा सहकार्य गर्न आग्रह गर्दा अस्वीकार गरेको सार्वजनिक भयो। गीतले बजार लिँदै गयो।
गीतको शब्दहरू उनले यो दुई वर्षमा भोगेका पलहरूसँग जोडियो। म्युजिक टोनलाई श्रोताले मन पराए। टिकटकमा कब्जा नै हान्यो गीतले।
विवादपछि कमब्याकका लागि उनले गरिरहेको प्रयास सार्थक भयो। पुन दुर्गेश स्टेज कार्यक्रमहरूमा छाउन थाले। हिजोका दिनमा दुर्गेशको विपक्षमा देखिएका सञ्चारकर्मी पनि अहिले दुर्गेशको अन्तर्वातामा व्यस्त छन्। दुर्गेशको दाबी अनुसार भारतीय म्युजिक कम्पनी टिसिरिजले यसलाई हिन्दीमा बनाउन प्रस्ताव गरेको छ।
गायक कम, फर्फर्मर ज्यादा
एक अन्तर्वार्तामा उनले नारायण गोपालको भनेर भक्तराजको गीत गाउँदा नमज्जासँग ट्रोलमा परे स्वरको गुणस्तरका कारण। अटोट्युनको भरमा गायक भएको भनेर खुब आलोचना भयो उनको।
उनले त्यो बिचमा ‘रातो रातो खोर्सानी पिरो छ’,‘कि दुर्गेश रेलमा कि दुर्गेश जेलमा’, ‘चिसो बियर’,‘डन आयो डन’ र ‘हामी पनि नाच्नुपर्छ बिचबिचमा’ जस्ता गीत निकालेर चर्चित भइसकेका थिए। नारायण गोपाल घटनाले भने हल्का मार्केट बिगार्यो उनको।
तर उनी हच्किएनन्। उनले आफूलाई स्वरसम्राट नारायण गोपालसँग दाँज्नु नै गलत भएको भन्दै ‘आफू गायक कम फर्फर्मर ज्यादा’ भएको हाकाहाकी भन्दै आए। अहिले पनि त्यही भन्छन्। देखिन्छ पनि त्यही।
उनको सबैभन्दा शक्तिशाली पक्ष नै मासलाई चाँडै प्रभावित पारिहाल्ने म्युजिक बिट हो। अनि सरल शब्द। शब्दको गहनता र अर्थ खोज्न थाल्यो भने ‘ह्या’ भन्ने लाग्न सक्छ। तर एकछिन मुड फ्रेस गर्नलाई भने मजा दिन्छ उनको म्युजिक अनि शब्दले। आयुका हिसाबमा कालजयी हैन उनका गीत। तर तत्काल मार्केट तताउन प्रभावकारी नै देखिन्छ उनको गीत र संगीत।
असफल दुर्गेश
दुर्गेशको यात्रा हेर्ने हो भने सफल भन्दा असफलताकै सूची लामो देखिन्छ। तर उनले अहिले पाएको सफलताले ती सबै असफलता ओझेलमा परेका छन्।
भारतीय सैनिक परिवारका सदस्य हुन् उनी। उनको बाबु भारतीय आर्मी। त्यसैले उनको घर बागलुङको गलकोटमा भए पनि जन्म भारतको सिक्किममा भयो।
उनका बुबा दुर्गेशलाई भारतीय सेनामै जागिर लगाउन चाहन्थे। यता नेपालमा माओवादीको सशस्त्र द्वन्द्व बढिरहेको थियो। उनी कक्षा ८ मा पढ्दै थिए। पढाइ छाडेर भर्ती हुन भारत गए अनि भर्ती पनि भए।
तर जागिरे यात्रा त्यति लामो गएन। भारतको कार्गिलको लडाइमा बाबु जाँदा घरमा छट्पटिएर बसेकी आमाको अवस्था देखेका उनी भागेर नेपाल फर्किए।
पढाई कक्षा ८ मात्र। पाएको जागिर पनि छाडेर आएपछि छोरो नालायक हुने भो भनेर लामो समयसम्म उनको बुबा बोलेनन् रे उनीसँग।
जसरी नि क्याम्पस पढेर देखाउँछु भनेर भारतको बिहार गए। त्यहाँ लेख्न मात्र आए पनि पास हुने। परीक्षामा प्रश्नसँगै उत्तर पनि दिइन्। उनी त्यस्तै स्कुलमा भर्ना भए अनि परीक्षा दिएर सर्टिफिकेट बोकेर नेपाल आए।
तर नेपालको शैक्षिक संस्थाले मान्यता दिएको थिएन उनको हातमा भएको सर्टिफिकेटवाला स्कुललाई क्याम्पस पढ्न पाएनन्। अब ट्याक्सी चलाएर खाने हो भनेर पोखरा आए।
तर ट्याक्सी चलाउन आउँदैनथ्यो। सिक्न प्रशिक्षण केन्द्रमा भर्ना भए। एक महिनाभित्र ट्याक्सी चलाउन सिक्ने सर्तमा भर्ना भएका थिए। तर पानी परेको पर्यै गरेर एक महिनामा ट्याक्सी सिक्न सकेनन्। त्यो पनि असफल।
पानी परेर ट्याक्सी चलाउन सिक्न नपाएको झोकमा गीत फुर्यो। त्यो लेखे। अनि घर फर्किए।
वसन्तले बदलिदिएको बाटो
गाउँमा अर्का गायक थिए वसन्त थापा। उनले पोखरामा फुरेको गीत देखाए। उनले दुर्गेशले सांगीतिक क्षेत्रमा केही गर्न सक्छ भनेर काठमाडौँमा ल्याए। उनी २०६३ तिर काठमाडौँ आएर वनस्थलीमा बस्न थाले।
गीत गाउने प्रयास नगरेका हैनन्। तर सकेनन्। अनि अब डान्स सिकेर हिरो हुन्छु भनेर कोरियोग्राफर शंकर बिसीकोमा नृत्य सिक्न थाले।
हिरो त उस्तै हो रेस्टुरेन्टमा नाच्न सक्नेसम्म भए। नाच्न थाले। रेस्टुरेन्टमा नाच्दानाच्दै केही म्युजिक भिडियोमा साइडमा नाच्न सक्ने भइसकेका थिए। तर एक कोरियोग्राफरले यस्तो गाली गरे कि नाच्न मन लाग्न छाड्यो उनलाई।
अनि आफ्नै लगानीमा गायक रामचन्द्र काफ्लेको गीत ‘माया लाएर के भो भन्ने म्युजिक भिडियोमा मोडल भए।
२०६५ मा गायक विमल डाँडीको दसैँ गीतमा अभिनय गर्ने मौका पाए। त्यसले अलिअलि चर्चा बटुल्यो। त्यस बेलाका चर्चित गायिका पूर्णकला बिसीसँग ‘अँधेरीमा जुन लाएको हो...’मा सहकार्य गरे।
म्युजिक भिडियोमा चल्न थालेपछि आफैँ गीत लेख्ने र गाउने मात्रै हैन म्युजिक भिडियोमा आफैँ अभिनय गर्न थाले। उनी चल्दै गए।
उनका गीतहरू हिट लिस्टमा पर्न थाले। उनी व्यस्त हुन थाले। लाइफ ट्र्याकमा आयो।
अनि सुरु भयो विवाद
गीतकै कारण प्रहरी चौकी धाउनु, कार्यक्रम नै स्थगित हुने तहसम्मको विवादमा तानिन थाले दुर्गेश। जब पल केसमा उनी जोडिए त्यसपछिका करिअरै ठप्प हुने जोखिम बढ्यो।
तिहारमा दुर्गेशले ‘ह्याप्पी तिहार चिसो बियर’ बोलको गीत सार्वजनिक गरेका थिए। तिहारको गीतमार्फत सांस्कृतिक विचलन गरेको र प्रतिबन्धित गाँजा सेवन गर्न उक्साएको आरोपमा काठमाडौं जिल्ला प्रशासन कार्यालयमा उनी विरुद्ध उजुरी परेको थियो। उनी यहीँ गीतका कारण प्रहरी कार्यालय जानुपर्यो। उनले तत्कालै आफ्नो युट्युब च्यानलबाट गीत हटाएर माफी मागेका थिए।
उनका गीतका शब्द पनि विवादित भए। उनले गाएको गीत ‘हामी पनि नाच्नुपर्छ बिच बिचमा’कै म्युजिक ट्याकमा ‘छक्का पन्जा ३’ को प्रमोसनल गीत बनाउँदा पनि विवादमा तानिएका थिए। यस गीतमा उनले एउटा लाइनमा ‘यसपालि त (फलाना) ब्याउने कुरो छ’ले आपत्तिजनक शब्द मिसाएको भनेर आरोप लाग्यो।
‘बिच्च बिच्चमा २’मा उनलाई गीत चोरी गरेको आरोप लाग्यो। गायक गायिका प्रेमराज महत र हरिदेवी कोइरालाको पुरानो गीत ‘आकाशैमा बादलु डम्मैछ, मनमा के छ भन्नेलाई सम्मै छ’ भन्ने अन्तरा चोरेको आरोप लाग्यो।
यहीँ गीतको भाग ३ को भिडियोमा दुर्गेशले पुरुष कलाकारलाई महिलाको पहिरन लगाएर नचाए। विवाद हुने नै भयो। ‘बीच्च बीच्चमा ४’ मा ‘ख्यास्स पुतली’ शब्दले विवाद बढायो।
तीजको मर्म विपरीत र कला संस्कृतिमाथि प्रहार गरिएको भन्दै राष्ट्रिय लोक तथा दोहोरी गीत प्रतिष्ठानले कारबाही गर्ने चेतावनी दियो।
केही वर्षअघि एक अन्तरवार्तामा उनले स्वरसम्राट नारायण गोपालको भनेर गायक भक्तराज आचार्यको गीत ‘मुटु जलिरहेछ, यो मन गलिरहेछ’ गाए। उनी ट्रोलको सिकार भए।
पल शाहको विवादले त केही समय उनको सांगीतिक यात्रामै विराम लगायो। म्युजिक अरेन्जतिर लागे। प्रशिक्षण नै लिएर केही फिल्मको गीतमा म्युजिक अरेन्जरको काम पनि गरे।
अनि हार नखाई नयाँ गीत निकाले। उनकै दृष्टिमा ठिकै चल्ला भनेको गीतले उनलाई स्टेज कब्जाको हैसियतमा पूर्याइदियो। बिचका सबै विवाद माटो बन्यो।
सफलताबाट हौसिएका उनी अब भन्दैछन् 'फिल्म बनाउँछु।'
चैत २०, २०८१ बुधबार १५:३०:४१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
