फन्दामा पारस : एनपिएलको बदमासी छानबिन गर्न परिषद्ले गठन गर्यो समिति
काठमाडौँ : नेपाल प्रिमियर लिगमा भएको अनियमितताबारे छानबिन गर्न राष्ट्रिय खेलकुद परिषद्ले समिति गठन गरेको छ। एनपिएलमा अवैध रूपमा विदेशी कम्पनीलाई नेपाल ल्याउनेदेखि अपारदर्शी कारोबारसम्मको अध्ययनका लागि परिषद्ले परिषद् सदस्य अञ्जन धमलाको संयोजकत्वमा छानबिन समिति गठन गरेको हो।
तीन सदस्यीय समितिमा सारङ्गी निरौला र कमल दाहाल रहेको र छानबिनका लागि १५ दिनको समय दिएको परिषद्स्रोतले उकेरालाई जानकारी दियो।
नेपाल क्रिकेट एसोसिएसनको आयोजनामा भएको नेपाल प्रिमियर लिगमा प्रायोजनदेखि प्रत्यक्ष प्रसारणसम्ममा भएका बदमासीबारे उकेराले निरन्तर समाचार प्रकाशित गर्दै आएको छ।
नेपालको कानुन विपरीत विदेशी कम्पनीलाई एनपिएलको व्यवस्थापनमा प्रयोग गरेको, एनपिएलको मैदानमा अनलाइन जुवा प्रवर्धनमा दुरुपयोग गर्दै सरोगेट ब्रान्डको प्रचार गराएको, नेपालको कानुन विपरीत प्रतियोगितामा अन्तर्राष्ट्रिय विज्ञापनहरू प्रसारण गरेकोमा एनपिएल आयोजक समिति विवादमा तानिएको थियो। समितिको प्रमुख सचिव पारस खड्का हुन्।
स्रोतका अनुसार एनपिएल आयोजनाको क्रममा भएका बदमासीहरूबारे छानबिन गर्न अख्तियार दुरुपयोग अनुसन्धान आयोगले खेलकुद मन्त्रालयलाई निर्देशन दिएको थियो।
आयोगमा २०८१ मंसिर ८ मा एनपिएलको आयोजनाको क्रममा आयोजकले प्रचलित सार्वजनिक खरिद ऐन विपरीत हुने गरी भ्रामक सूचना जारी गर्दै नेपाली मिडिया तथा विज्ञापन उद्योगको श्रोत र क्षमताको अवमूल्यन गरेको, प्रचलित अन्य कानुनहरूको अलावा विज्ञापन नियमन गर्ने ऐन उलङ्घन गरेको, नेपालमा विज्ञापन व्यवसाय गर्न विज्ञापन बोर्डमा दर्ता हुन विदेशी टेलिभिजन च्यानलको सदस्यता लिनुपर्ने बाध्यात्मक परिस्थिति सिर्जना गरेको, राष्ट्रिय खेलकुद विकास ऐन, राष्ट्रिय खेल सङ्घ वा प्रदेश र स्थानीयस्तरका खेल सम्बन्धी संस्था वा निकाय तथा सङ्घले विदेशी सरकार, अन्तर्राष्ट्रिय रूपमा प्रतिष्ठा कमाएका अन्य अन्तर्राष्ट्रिय च्यानललाई मौका नदिई सार्वजनिक खरिद ऐन विपरीत विना टेन्डर/प्रतिस्पर्धा स्टार स्पोर्टसलाइ दिएको भन्दै उजुरी परेको थियो।
अख्तियारले उजुरी सम्बन्धमा छानबिनका लागि युवा तथा खेलकुद मन्त्रालयमा पठाएपछि मन्त्रालयले परिषद्मा पत्राचार गरेको थियो।
सोही अनुसार छानबिनका लागि समिति गठन गरिएको परिषद्स्रोतले उकेरालाई जानकारी दियो। परिषद्ले १५ कार्य दिनभित्र यथार्थ विवरण सहितको प्रतिवेदन पेस गर्न समितिलाई निर्देशन दिएको छ।
आम्दानी र खर्च सार्वजनिक भएन
एनपिएलको खेल सकिए पनि क्यानले अहिलेसम्म प्रतियोगिताको आम्दानी र खर्च सार्वजनिक गरेको छैन। आयोजक समितिले प्रतियोगिताको आर्थिक विवरण प्रतियोगिताका आठ फ्रेन्चाइज टिमलाई समेत देखाउन सकेको छैन।
उसले एनपिएलको पहिलो सिजनका विजेता टोलीलाई अहिलेसम्म पनि पुरस्कार रकम दिएको छैन।
क्यानले कानुन विपरीत एनपिएलको इभेन्ट रणनीति र मार्केटिङ कन्सल्ट्यान्टमा ट्वान्टी फस्ट सेन्चुरी मिडिया (टिसीएम) स्पोर्ट्ससँगलाई नियुक्त गरेर अवैध रूपमा रकम भुक्तानीको प्रयास गरेको थियो।
क्यान र टिसिएमका पदाधिकारीबिचको आर्थिक कारोबार शङ्कास्पद देखिएकोबारे उकेराले प्रमाणसहित समाचार प्रकाशित गरिसकेको छ।
विदेशी संस्था वा व्यक्तिसँग सहकार्य गर्न सरकारले निर्णय गर्नुपर्ने कानुनी प्रावधान रहे पनि एनपिएलमा टिसिएम इभेन्ट रणनीति र मार्केटिङ कन्सल्ट्यान्टमा नियुक्त हुँदा सम्बन्धित मन्त्रालयले निर्णय गरेको थिएन।
टिसिएम सत् प्रतिशत विदेशी लगानी भएको कम्पनीको रूपमा नेपालमा समेत दर्ता छ। यसको दुवै सञ्चालक विदेशी छन्।
टिसिएम भारतीय कम्पनी हो। तर यसको दुबइमा रहेको कार्यालयले क्यानलाई ९२ हजार ५ सय अमेरिकी डलर ( करिब एक करोड २७ लाख रुपैयाँ) को बिल पठाएको प्रमाण उकेरासँग सुरक्षित छ।
गत कात्तिक २९ गते (२०२४ नोभेम्बर १४) टिसिएमले क्यानको नाममा ९२ हजार पाँच सय अमेरिकी डलरको बिलको प्रयोजन एनपिएल २०२४ को ब्रोडकास्ट प्रडक्सन कस्टको ५०%उल्लेख छ। पारस खड्काले एनपिएलमा वुल्भत्रिपलसेभेन नामक अनलाइन जुवा खेलाउने कम्पनीको विज्ञापन राखेर अनलाइन जुवा प्रवर्धन गरेका थिए।
एनपिएलमा मुख्य प्रायोजक र प्रायोजकहरूसँग भएको सम्झौता र रकम अहिलेसम्म गोप्य राखिएको छि एनपिएलमा विज्ञापन बोर्डको अनुमति नलिई विदेशी विज्ञापन राखिएको थियो।
उकेराले सूचनाको हक सम्बन्धी कानुन अनुसार क्यानसँग एनपिएलसँग सम्बन्धित सम्झौता पत्रको प्रमाणित कपी माग गरेको थियो। क्यानले सो उपलब्ध नगराएपछि सूचना आयोगमा पुनरावलोकन निवेदन दिइएको छ।
चैत २०, २०८१ बुधबार १४:४३:२७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
