भगौडा सैनिक रामबहादुरको अपराध यात्रा : शक्ति बस्नेतको हत्या प्रयासदेखि विश्नोइ कनेक्सनसम्म

काठमाडौं : २०५९ सालसम्म ४१ वर्षीय रामबहादुर बिसी नेपाली सेनामा थिए। सुर्खेत भेरीगंगा नगरपालिका–७ काठेघारीका उनले त्यसपछि सेना छाडे। भगौडा भए।

जब उनी सेनाका भगौडा भए त्यहाँ सिकेको हतियार चलाउने सिपलाई अपराध कर्ममा लगाए। २०६४ बाट उनको अपराध यात्रा प्रहरीको रेकर्डमा पर्न थाले।

२०६४ भदौ ९ मा पहिलो पटक उनी विरुद्ध फिरौती लिएको आरोपमा मुद्दा चल्यो। तत्कालीन महानगरीय प्रहरी परिसर काठमाडौँबाट पहिलो पटक उनी विरुद्ध अनुसन्धान भएको थियो।

लगत्तै उनी २०६४ मै संविधानसभाको निर्वाचनको हत्या घटनामा जोडिए। उम्मेदवार ऋषि शर्मालाई गोली हानेर हत्या गरेको आरोपमा उनलाई इलाका प्रहरी कार्यालय छिन्चुमा मुद्दा चल्यो।

२०६५ मै द्वन्द्वपीडित सेना-प्रहरीको आन्दोलनमा सहभागी भए उनी। आन्दोलनमा प्रहरीको हतियार खोसेको आरोप लाग्यो उनीमाथि।

त्यही वर्ष तत्कालीन प्रधानमन्त्री पुष्पकमल दाहाल प्रचण्डको स्वकीय सचिव रहेका शक्तिबहादुर बस्नेतमाथि कोटेश्वरमा गोली प्रहार भयो।

साँझ साढे सात बजे लोडसेडिङ भएको थियो। उनी कोटेश्वरको निखिलेश्वर मन्दिरनजिक रहेको घर जान गाडीबाट ओर्लिए लगत्तै उनीमाथि अन्धाधुन्ध गोली प्रहार भएको थियो। उनको तिघ्रामा गोली लागेको थियो।

बस्नेतको हत्या प्रयासको आरोपमा उनी पक्राउ परे। अदालतबाट दोषी ठहर भएपछि ५ वर्ष जेल सजाय र ६० हजार जरिवाना भयो। उनी २०७० सम्म जेलमै रहे।

त्यसयता उनी कुनै अपराधमा जोडिएर पक्राउ परेका थिएनन्। उनलाई बुधवार बाँकेमा पक्राउ परे। इलाका प्रहरी कार्यालय कोहलपुरको टोलीले उनलाई भारतीय आपराधिक समूहका नाइके लरेन्स विश्नोइको नाम लिएर आठ करोड फिरौती मागेको आरोपमा पक्राउ परेका हुन्।

उनीमाथि प्रहरीले भारतीय नम्बर प्रयोग गरेको ह्वाट्स एपबाट कल गरेर धम्क्याउँदै पाँच करोड भारु मागेको आरोप लगाएको छ। उनले लरेन्सको भाइ अनमोलको नाम लिएर फिरौती मागेको प्रहरीको दाबी छ।

लरेन्स समूहसँग उनको सम्बन्ध छ या छैन त्यो भने प्रहरीले खुलाएको छैन।

चैत २०, २०८१ बुधबार १४:०८:३५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।