पीताम्बरको ट्रेलरमै हिंसाको ओभरडोज, ब्याकफायरको जोखिम

काठमाडौँ : तीनकुनेमा एक व्यक्ति प्रहरीको गोली लागेर मारिए भन्ने समाचार सार्वजनिक हुँदा त्यसको त्यति ठूलो नकारात्मक प्रतिक्रिया देखिएको थिएन।

तर समाचार सङ्कलन गर्न गएका एक पत्रकार ज्युँदै जलेर मारिए भन्ने समाचार बाहिरिएसँगै त्यसले तीव्र प्रतिक्रिया पायो। विरोध प्रदर्शनको आयोजकको सबैतिर आलोचना भयो। सरकार कारबाहीको प्रक्रियामा गयो।

यो घटनामा दुवैको मारिएका हुन्। तर किन प्रतिक्रिया फरक भयो। कारण अति हिंसा। कुनै व्यक्तिलाई गोली लागेर उपचारका क्रममा निधन हुनु र कुनै व्यक्ति ज्युँदै आगोमा पोलिएर तड्पी तड्पी मारिनुमा निकै फरक छ। जब व्यक्तिको दिमागमा यो घटना दृश्य बनेर छिर्छ त्यसले आक्रोश जन्माउँछ। इरिटेट गराउँछ।

 एक्सन प्रधान फिल्म भन्दै जति हिश्रक दृश्य राख्यो त्यति चल्छ भन्ने भ्रमले नेपाली फिल्महरूमा पछिल्लो समयमा अति नै गाँजेको छ।

दक्षिण भारतीय फिल्मको यो शैलीलाई भारतको मुम्बई फिल्मी दुनियाँले समेत एनिमल जस्तो फिल्ममा भरपुर प्रयोग गरेको थियो।

त्यही ट्रेन्ड नेपाल सर्दा हेर्दा नै सकस हुने हिंसात्मक दृश्यहरू बढिरहेका छन्। त्यस्तै देखियो फिल्म पीताम्बर पनि। फिल्म कस्तो छ भनेर चियाउने ऐना मानिने उसको ट्रेलरकै केही क्लिप हेर्नै सकस हुने खालको मान्छेको टाउको काटेर रगत चुहाउँदै बोकेर हिँडेका छन्।

भिएफएक्स खेलाउँदै यस्ता दृश्य फिल्ममा राख्दा वाह क्या दामी सिन भनेर दर्शक आकर्षित हुन्छन् भन्ने लागेको हुनसक्छ निर्माण टिमलाई। तर अति हुँदा हुने खती नै हो।

ट्रेलरमै यी दृश्य राखिएकाले फिल्ममा यस्ता दृश्यको सङ्ख्या पक्कै बढी नै होला। यसले फिल्म निर्माण टिमले ‘वाह क्या दामी’ हैन ‘छ्या कति हिंस्रक’ भन्ने प्रतिक्रिया पाउने जोखिम उच्च देखायो ट्रेलरले। अनि हिंसाप्रति समाजको प्रतिक्रिया कस्तो हुन्छ त्यो त तीनकुनेका दुई मृत्युले देखायो नै।

फिल्म चैत २९ गते रिलिज हुँदैछ।

चैत २०, २०८१ बुधबार ०९:५४:४४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।