मार्फामा भेटिन्छन् ‘जेरी’देखि ‘कबड्डी’ गल्लीसम्म,जुन फिल्म सुटिङ भयो त्यसैको नाम राखियो
मुस्ताङ : मार्फा गाउँ जाने हो भने त्यहाँ भेटिन्छ जेरी गल्ली, कबड्डी गल्ली, टिकटक गल्ली र झाँक्री गल्ली। स्याउ आकृतिको साइनबोर्डमा गल्लीका नाम टाँसिएको छ।
कुनै समय दुर्गम मानिने मार्फाका यी गल्लीको नाम जुरेको हो त्यहाँ छायाँकन भएका फिल्मको आधारमा। जुन गल्लीमा जुन फिल्मको सुटिङ भयो त्यसको नाम त्यही राखियो।
स्याउको बगैँचा र पुराना प्राचीन घरहरू रहेको गाउँभित्र साँघुरा तर आकर्षक गल्लीको सङ्ख्या दर्जन बढी छन्। सडक सञ्जालले मार्फा पुग्न सहज बनाएसँगै यहाँ पर्यटकको सङ्ख्या बढेको छ नै फिल्मको सुटिङ पनि बढेका छन्।
साँघुरा गल्लीहरूलाई फिल्मको पर्दामा देखाउन चलचित्र निर्माणकर्मीहरू मार्फा पुगिरहन्छन्। त्यहीँ फिल्म जेरी अनि कबड्डीको सुटिङ भएको थियो। अनि जहाँ फिल्मको सुटिङ भयो त्यसको नामै त्यही राखिदिए स्थानीयले।
भदौदेखि असोज र कात्तिक महिनामा मुस्ताङ आउने पर्यटकले मुस्ताङको मार्फा स्याउ बगानमा लटरम्म स्याउ फलेको देख्न सकिन्छ। हिउँदयाम सकिँदै गर्दा र वसन्त ऋतुको आगमनसँगै मुस्ताङको मार्फा गाउँमा आन्तरिक पर्यटकको उपस्थिति थेगिनसक्नु हुन्छ।
सूर्य विनायक नगरपालिका भक्तपुरबाट मुक्तिनाथ दर्शन गर्न परिवारका सदस्यसहित मुस्ताङ आएका बलराम गौतम मुस्ताङको मार्फा गाउँको सांस्कृतिक सम्पदा देखेर आफू मोहित भएको बताए।
पहिलो पटक मुस्ताङ आएका गौतमले मार्फा गाउँको परम्परागत पुराना, ढुङ्गा र माटोले बनेका घर, प्रत्येक घरका छतमाथि राखिएका दाउराको चाङ र अनि गाउँभित्रको साँघुरो गोरेटो गल्ली घुम्दा निकै रमाइलो लागेको बताए।
‘साँघुरो गल्लीभित्र होटेल र पसल नै रहेछन्, सडकमार्गमै पर्ने भएकाले यहाँ घुम्न निकै सजिलो रहेछ’ उनले भने।
मार्फा गाउँमा करिब एक सय भन्दा बढी घरधुरी छन्। स्याउ लगायतका अन्नबाली उत्पादन गरेर मनग्ये आम्दानी गर्ने मार्फाली समुदायले पर्यटन व्यवसायलाई पनि मुख्य आम्दानीको रूपमा व्यवसाय चलाउँदै आइरहेका छन्।
बर्सेनि पर्यटक आगमन बढेसँगै पछिल्लो समय बेनी-जोमसोम मुख्य सडकमा स्याउ बगैँचा मासेर कङ्क्रिट होटेल निर्माण गर्ने होडबाजी समेत सुरु भएको छ।
घरपझोङ गाउँपालिकाका अध्यक्ष मोहनसिंह लालचन मार्फा गाउँको पुरानो भौतिक संरचना मासिन नहुने बताउँछन्। सडकमार्गमा कङ्क्रिट घर बने पनि मार्फाको प्राचीन बस्तीको भौतिक तथा सांस्कृतिक संरचना मासिएमा मार्फा गाउँको अस्तित्व सङ्कटमा लालचनले बताए।
गाउँ नजिकैको एक थुम्कोमा घरपझोङ गाउँपालिकाले एप्पल पार्कसमेत निर्माण गरिसकेको छ। साँझपखको समयमा सडक बत्तीको उज्यालोले मार्फा गाउँको सौन्दर्यतालाई थप रमाइलो बनाउँछ।
-राससको सहयोगमा
चैत २०, २०८१ बुधबार ०९:२३:५८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
