ऊर्जा मन्त्रालयको हटलाइनमा गुनासो : सूचनाबिना नै बत्ती किन काटेको ?
काठमाडौँ : काममा ढिलासुस्ती, सूचनाबिना नै बत्ती काट्ने, मिटर नपाउने, ट्रान्सफर्मर जल्ने, अनियमित मिटर रिडिङ अनि अनावश्यक झन्झट।
ऊर्जा, जलस्रोत तथा सिँचाइ मन्त्रालयको हटलाइन सेवामा आएका उजुरी हुन् यी। हटलाइनमा फागुन महिनामा एक हजार ९ सय २ वटा उजुरी दर्ता भएको थियो। चैत महिनामा एक हजारभन्दा बढी गुनासो आइसके।
हटलाइनमा प्राप्त गुनासोमध्ये ट्रान्सफर्मर जलेको, पोल ढलेको, विद्युत् आपूर्तिमा अवरोध, भोल्टेज कम आउनुजस्ता विषय बढी छन्।
फोनबाहेक फेसबुक, भाइवरलगायतका डिजिटल माध्यमबाट सेवाग्राहीहरूले गुनासो गर्ने गरेका छन्। सबैभन्दा बढी गुनासो बागमती र मधेस प्रदेशबाट आएका छन्।
हटलाइन सेवामा कार्यरत रामकृष्ण पौडेलले गुनासो आउने बित्तिकै सम्बन्धित कार्यालय र वितरण केन्द्रका प्रमुखलाई जानकारी गराएर समस्या समाधान गर्दै आएको दाबी गरे।
गुनासो सम्बोधन गर्न थप जनशक्ति परिचालन गरिएको हटलाइनमा कार्यरत एकबहादुर महर्जनले जानकारी दिए।
चैत २०, २०८१ बुधबार ०८:२८:०७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
