फ्रोजन कुखुराको मासुमा लाग्दै आएको १३ प्रतिशत कर हटाउन पोल्ट्री महासंघको माग
काठमाडौँ : नेपाल पोल्ट्री महासंघले कुखुराको फ्रोजन मासुमा लाग्दै आएको १३ प्रतिशत मूल्य अभिवृद्धि कर हटाउन माग गरेको छ।
मंगलबार महासंघको एक प्रतिनिधि मण्डलले अर्थमन्त्री विष्णु पौडेलसँग भेटेर आयात गरेको कुखुराको मासुमा पाँच प्रतिशत अन्त शुल्क लाग्ने गरेकोमा अहिले भने नेपालमा उत्पादित कुखुराको मासु फ्रिजमा राखेर बेच्दा १३ प्रतिशत मूल्य अभिवृद्धि कर लगाउने गरेकोमा त्यो संशोधन गर्न माग गरेको।
उनीहरूले मन्त्री पौडेललाई बुझाएको ज्ञापन पत्रमा नेपाल उत्पादित कृषिजन्य प्राथमिक उत्पादनमा मूल्य अभिवृद्धि कर लगाउँदा उपभोक्ता मूल्य बढ्न गएको र चोरी पैठारी बढेको भन्दै मूल्य अभिवृद्धि कर हटाउन माग गरिएको छ।
२०७९ सम्म आर्थिक ऐनमा सिङ्गो र टुक्रा पारिएका फ्रोजन कुखुराको मासुमा आयातमा मूल्य अभिवृद्धि करमा छुट रहेको र पाँच प्रतिशत मात्र अन्त शुल्क थियो।
आर्थिक ऐन २०८० मा आएर यी दुबैमा लाग्ने गरेको अन्त शुल्क हटाएर मूल्य अभिवृद्धि कर लगाएको थियो।
ताजा मासु बेच्दा कर नलाग्ने तर त्यही मासु फ्रिजमा राखेर बेच्दा १३ प्रतिशत कर लाग्ने व्यवस्था अव्यवहारिक भएकाले १३ प्रतिशत मूल्य अभिवृद्धि करको प्रावधान हटाउनु पर्ने महासंघका महासचिव दिनेश मिश्रले बताए।
भेटमा अर्थमन्त्री पौडेलले महासंघको मागमा सरकार सकारात्मक रहेको र आगामी बजेटबाट समस्या समाधान गर्ने बताएको मिश्रले बताए।
आर्थिक ऐन २०८० मा भएको करको परिवर्तनले पोल्ट्री उद्योगलाई नराम्रो असर गरेको आत्मनिर्भर रहेको उद्योगलाई परनिर्भरतामा जाने जोखिम बढेको मिश्रले दाबी गरे।
'आयातमा अन्तःशुल्क र कस्टम कर लगाउनु पर्यो। नेपालमै उत्पादित सिंगो र टुक्रा पारेर विक्री हुने फ्रोजन कुखुरामा लाग्दै आएको भ्याट हटाउनु पर्यो' ,'मिश्रले भने 'नेपालमै उत्पादित कुखुराको फ्रोजन मासुमा भ्याट लगाउँदा यता मासु महँगो हुन्छ। भारतबाट तस्करी बढ्छ। चोरी-तस्करी रोक्न पनि नेपालमा उत्पादित कुखुराको फ्रोजन मासुमा भ्याट लगाउनु गलत हो।'
पोल्ट्री क्षेत्रमा करिब एक खर्ब ६० अर्बको लगानी रहेको, प्रत्यक्ष तीन लाख र अप्रत्यक्ष गरी करिब पाँच लाख जनाले रोजगारी पाएको उनले बताए।
चैत १९, २०८१ मंगलबार १७:२५:२३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
