शिशिर र सुमनाविरुद्ध कानूनी उपचारमा जाने डा. केसीको चेतावनी
काठमाडौं : नेपाली कांग्रेसका नेता डा केदारनरसिंह केसीले राष्ट्रिय स्वतन्त्र पार्टीका सांसदहरूले सार्वजनिक जग्गासँग नाम जोडेर आफ्नो चरित्रहत्या गर्न खोजेको आरोप लगाएका छन्।
शनिबार लोकतान्त्रिक चोकस्थित आफ्नै निवासमा पत्रकार सम्मेलन गरी उनले गत फागुन २८ मा प्रतिनिधिसभाको बैठकमा राष्ट्रिय स्वतन्त्र पार्टी (रास्वपा)का सांसदद्वय शिशिर खनाल र सुमना श्रेष्ठले दिएको अभिव्यक्ति राजनीतिक पूर्वाग्रहपूर्ण रहेको बताए।
‘साविक मनमैजु गाविस वडा नं ९ हाल तारकेश्वर नगरपालिका वडा नं १० लोकतान्त्रिक चोकमा रहेको कित्ता नं ६१ र ६२ मेरो तथा मेरो परिवारका नाममा र कित्ता नं ६३ सार्वजनिक जग्गा हो, मलाई सरकारी जग्गा एक कित्ता पनि चाँहिदैन, मेरो चरित्रहत्या गर्ने मनसायका साथ संसदमा आवाज उठाउँदा म दुःखी भएको छु’, डा. केसीले भने।
उनले सांसदद्वयको अभिव्यक्तिले आफ्नो राजनीतिक चरित्रहत्या भएको भन्दै कानूनी उपचारमा जानेसमेत स्पष्ट पारे। डा. केसीले आधार र प्रमाणबिना कपोलकल्पित र भ्रमपूर्ण प्रश्न संसदमा उठ्नु गलत भएको समेत बताए।
पत्रकार सम्मेलनमा तारकेश्वर नगरपालिकाका प्रमुख कृष्णहरि महर्जनले स्थानीय जनप्रतिनिधिसँग समन्वय नगरी व्यक्तिगत चरित्रहत्या र मानहानी हुने हिसाबले संसदमा कुरा उठाउनु गलत भएको बताए।
नगरप्रमुख महर्जनले सार्वजनिक जग्गा संरक्षणका लागि तारकेश्वर नगरपालिका लागिरहेको भन्दै राजनीतिक पूर्वाग्रह राखेर आम नागरिकलाई भ्रम फैलाउने काम जनप्रतिनिधीबाटै भइरहेकोमा चिन्ता व्यक्त गरे।
‘म सङ्घीय सांसद र प्रदेश सांसदहरूलाई भन्न चाहन्छु, आउनुहोस् सार्वजनिक जग्गा कहाँ-कहाँ मिचिएको छ बसेर नापजाँच गरौँ’, नगरप्रमुख महर्जनले भने, ‘भूगोल नभएको कुरालाई लिएर संसदमा प्रस्तुत हुनु गलत हो।’
पत्रकार सम्मेलनमा नेपाली कांग्रेस काठमाडौं क्षेत्र नं ६ का क्षेत्रीय सभापति श्यामकृष्ण खड्गी, एमाले नेता लब बस्नेत, कांग्रेस नेता इन्द्रमान महर्जन, तारकेश्वर वडा नं १० का वडाअध्यक्ष कुमार राईलगायतले लालपुर्जाले प्रष्ट पारिसकेको विषयमा संसदजस्तो जिम्मेवार थलोमा बोल्नुले संसदको गरिमा घटाएको बताए।
चैत २, २०८१ शनिबार १३:५८:५० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
