महिला टी-ट्वान्टी क्रिकेटमा नेपालले युगान्डालाई हरायो

काठमाडौँ : युगान्डामा जारी चार देशीय महिला टी-ट्वान्टी क्रिकेट प्रतियोगितामा नेपालले आफ्नो पहिलो जित हासिल गरेको छ। नेपालले आफ्नो दोस्रो खेलमा आयोजक युगान्डालाई एक विकेटले हराएको हो।

युगान्डाको एन्टेब्बे क्रिकेट ओभल मैदानमा टस जितेर नेपालले पहिला फिल्डिङ रोज्यो। घरेलु टोली युगाण्डाले निर्धारित २० ओभरमा ७ विकेट गुमाएर ७५ रन बनायो। जवाफमा नेपालले १९.५ ओभरमा ९ विकेट गुमाएर लक्ष्य पूरा गर्न सफल भयो।

नेपालका लागि साना प्रवीनले सर्वाधिक १७ रन बनाइन्, जसमा एक चौका समावेश थियो। पूजा महतोले १६ र रुबिना क्षेत्रीले १० रनको योगदान दिए। सम्झना खड्काले ८, कप्तान इन्दु बर्माले ६ तथा ईश्वरी विष्टले अविजित ३ रन जोडिन्।

युगान्डाको इनिङ्समा इमाकुलेट नाकिसुईले सर्वाधिक २२ रन बनाइन्। स्टेफेनिया नाम्पिलिनाले १४ र मलिषा अरिकोटाले ११ रन जोडिन्। बलिङतर्फ नेपालकी पूजा महतोले ३ विकेट लिइन् भने कप्तान इन्दु बर्माले २ विकेट हात पारिन्।

यसअघि नेपाल आफ्नो पहिलो खेलमा नामिबियासँग ६ विकेटले पराजित भएको थियो। घरेलु टोली युगान्डाको यो प्रतियोगितामा पहिलो हार हो। उनीहरूले पहिलो खेलमा हङकङलाई हराएका थिए।

प्रतियोगितामा नेपाल, युगान्डा, नामिबिया र हङकङ सहभागी छन्। सबै टोलीले एक अर्कासँग दुई-दुई खेल खेल्नेछन् र लिग चरणपछि शीर्ष दुई टोलीबिच फाइनल खेल हुनेछ। नेपालले आफ्नो अर्को खेलमा सोमबार हङकङको सामना गर्नेछ।

फागुन २५, २०८१ आइतबार २१:१६:२१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।