पूर्वराजा फर्कँदा काठमाडौंमा सुरक्षा सतर्कता, तीन सुरक्षा निकाय परिचालन हुँदै

काठमाडौं : पोखराबाट पूर्वराजा ज्ञानेन्द्र काठमाडौं फर्कने क्रममा राजावादी संघसंस्था गर्ने प्रदर्शनका लागि सुरक्षा तयारी पूरा भएको छ।

राजावादीहरूको प्रदर्शन र जुलसमा हुनसक्ने अवान्छित क्रियाकलापलाई लिएर तीनै वटै सुरक्षा संयन्त्रलाई एकीकृत रुपमा प्रयोग गरिएको जिल्ला प्रशासन कार्यालय काठमाडौंका प्रवक्ता एवं सहायक प्रमुख जिल्ला अधिकारी अनिल रिजालले जानकारी दिए।

‘तीन वटा सुरक्षा निकायलाई एकीकृत तवरले परिचालन गर्दैछौँ,’ उनले उकेरासँग भने, ‘शुक्रबार बसेको जिल्ला सुरक्षा समितिको बैठकले सुरक्षाको सम्पूर्ण तयारी गरेको छ।’

उनका अनुसार जनपथ प्रहरी, सशस्त्र प्रहरी र राष्ट्रिय अनुसन्धान विभागबाट सुरक्षाकर्मीहरू सादा र प्रहरीको पोशाकमा फिल्डमा खट्नेछन्। सेना परिचालन नगरिने उनले बताए।

‘तीन वटा सुरक्षाा निकाय भनेको सशस्त्र, जनपथ र राष्ट्रिय सुरक्षा विभाग हो,’ उनले थपे, ‘सेना परिचालन हैन है!’

ज्ञानेन्द्रको स्वागतका लागि भन्दै राष्ट्रिय प्रजातन्त्र पार्टी र अन्य राजावादी संघसंस्थाहरुले त्रिभुवन विमानस्थलबाट महाराजगञ्जस्थित निर्मल निवाससम्म जुलुससहित लैजाने कार्यक्रम छ।

दिउँसो साढे तीन बजे काठमाडौं अवतरण गरेपछि बागागाजा र र्यालीसहित उनलाई महाराजगञ्ज लगिने  राप्रपाको कार्यक्रम छ। राप्रपाले राजाको स्वागतका लागि भन्दै आजको आफ्नो आमसभा नै स्थगित गरेको थियो।

फागुन २५, २०८१ आइतबार ०९:१४:०७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।