च्याम्पियन्स ट्रफीको फाइनलमा आज भारत र न्युजिल्याण्ड भिड्दै

काठमाडौं : च्याम्पियन्स ट्रफीको उपाधिका लागि आज भारत र न्युजिल्याण्ड भिड्दैछन्।

खेल दुबई अन्तर्राष्ट्रिय रंगशालामा दिउँसो २:४५ बजे सुरू हुनेछ। यहाँ दुवै टोली दोस्रो पटक आमनेसामने हुनेछन्। पछिल्लो खेलमा टिम इन्डियाले ४४ रनले जित हासिल गरेको थियो।

भारतले यहाँ अहिलेसम्म एउटा पनि एकदिवसीय खेल हारेको छैन। टोलीले १० खेल खेलेकोमा नौ खेल आफ्नो पक्षमा पार्दा एउटा खेल बराबरी भएको थियो।

हालसम्म दुई टोलीबीच ११९ एकदिवसीय खेल खेलिएका छन्। यसमा भारतले ६१ खेल जितेको छ भने न्युजिल्याण्डले ५० खेल जितेको छ। यसबाहेक ७ खेलमा नतिजा आएको छैन। जबकि एउटा खेल बराबरीमा सकिएको छ।

भारतले न्युजिल्याण्ड विरुद्धको पछिल्ला ६ एकदिवसीय खेल लगातार जितेको छ। यी दुई टोली अन्तिम पटक यस च्याम्पियन्स ट्रफीमा आमनेसामने भएका थिए, जब भारतले ४४ रनले जितेको थियो।

पिच र टस रिपोर्ट
दुबईको पिच ब्याट्सम्यानका लागि चुनौतीपूर्ण साबित भइरहेको छ। अहिलेसम्म यहाँ च्याम्पियन्स ट्रफीका ४ खेल खेलिएका छन्।

स्लो पिचका कारण, ४ मध्ये १ खेलमा मात्र २५० भन्दा बढीको स्कोर भएको छ। पिच स्लो भएकाले फाइनलमा भारतीय स्पिनरहरूले फाइदा लिन सक्छन्।

यहाँ दोस्रो इनिङमा ब्याटिङ गर्ने टोलीको जितको रेकर्ड राम्रो छ। भारतले पछिल्ला ४ खेलमध्ये ३ खेलमा लक्ष्य पछ्याउँदा जित हासिल गरेको छ। यस्तो अवस्थामा टस जित्ने टोलीले पहिले फिल्डिङ गर्ने निर्णय गर्न सक्छ।

मौसम रिपोर्ट:
आइतबार, फाइनल खेलको दिन दुबईमा प्रायः घमाइलो हुनेछ र केही बादल लाग्नेछ। तापक्रम २४ देखि ३३ डिग्री सेल्सियसको आसपास रहने अनुमान गरिएको छ। साथै, हावा प्रतिघण्टा १७ किलोमिटरको गतिमा चल्नेछ।

फागुन २५, २०८१ आइतबार ०७:४४:४६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।