टाइब्रेकरमा मछिन्द्रका तीन खेलाडी गोलमा चुकेपछि दोस्रो वीरगन्ज गोल्डकपको उपाधि नेपाल पुलिस क्लबलाई

वीरगन्ज : नेपाल पुलिस क्लबले दोस्रो वीरगन्ज गोल्डकप प्रतियोगिताको उपाधि जितेको छ। वीरगन्जको आदर्शनगर रङ्गशालामा शनिवार भएको फाइनल खेलमा नेपाल पुलिस क्लबले मच्छिन्द्र फुटबल क्लबलाई ‘टाइब्रेकर’मा ३-० गोल अन्तरले हराउँदै दोस्रो पटक उपाधि जितेको हो।

खेलको निर्धारित समयमा दुवै टोलीका तर्फबाट १-१ गोलको बराबरीमा खेल टुङ्गिएपछि खेल टाइब्रेकरमा धकेलिएको थियो। खेलको १३औँ मिनेटमा मच्छिन्द्र क्लबका समिराज थोकरले ‘हेड’मार्फत गोल गरेर अग्रता दिलाएका थिए। त्यस्तै, खेलको ५८औँ मिनेटमा नेपाल पुलिस क्लबका विकास विकले गोल गर्दै खेल बराबरीमा ल्याएका थिए।

पुलिस क्लबका तर्फबाट टाइब्रेकरमा कप्तान रामचन्द्र वाजी, सञ्जीव लामा र अमित टमटाले गोल गरेका थिए। उज्ज्वल राईको ‘पेनाल्टीसुट’ गोलमा परिणत हुन सकेन।

मच्छिन्द्र क्लबका तर्फबाट विशाल राई, दिवाकर चौधरी र समिराज थोकरले गोलमा परिणत गर्न सकेनन्। वीरगन्ज गोल्डकपको विजेता बनेको नेपाल पुलिस क्लबले ११ लाख ११ हजार एक सय, ट्रफी मेडल र प्रमाणपत्र प्राप्त गरेको छ।    

उपविजेता बनेको मच्छिन्द्र क्लबले पाँच लाख ५५ हजार पाँच सय ५५, ट्रफी, मेडल र प्रमाणपत्र पाएको छ। प्रतियोगितामा पुलिस क्लबका कप्तान रामचन्द्रवाजी सर्वोत्कृष्ट खेलाडी घोषित हुँदै इलेक्ट्रिक स्कुटर पाए।

पुलिस क्लबका अमित टमटा उत्कृष्ट गोलरक्षक बने। उत्कृष्ट प्रशिक्षक पनि पुलिस क्लबकै चेतन घिमिरे भए। उत्कृष्ट गोलरक्षक र उत्कृष्ट प्रशिक्षकलाई जनही २० हजारले पुरस्कृत गरियो। फाइनल खेलमा ‘म्यान अफ दी म्याच’ भने मच्छिन्द्र क्लबका समिराज थोकर बने।

फागुन २४, २०८१ शनिबार २२:४६:१४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।