घुम्न नयाँ गन्तव्य बन्न सक्छ ताप्लेजुङको बन्दुक पोखरी

ताप्लेजुङ : सदरमुकाम फुङ्लिङबाट करिब सात घण्टा गाडीको यात्रा अनि एक दिनको पैदल यात्रापछि पुग्न सकिन्छ तिम्बुङ पोखरी। सिदिङवा गाउँपालिकाको कालिखोलामा पर्छ यो। यो चार हजार तीन सय ५० मिटर उचाइमा छ।    

प्राकृतिक सौन्दर्य, धार्मिक आस्था र ऐतिहासिक महत्त्व बोकेकाले यो पोखरीलाई लिम्बू समुदायले ‘तिम्मक वरक’ भन्ने गरेका छन्। लिम्बू भाषामा‘तिम्मक’ को अर्थ बन्दुक र ‘वरक’ को अर्थ पोखरी हो।

किम्बदन्तीअनुसार परापूर्वकालमा यहाँबाट बन्दुक पड्किएको जस्तै आवाज आउने भएकाले यसलाई तिम्मक वरक भनिन्थ्यो, जुन अहिले ‘तिम्बुङ पोखरी’ को रूपमा परिचित छ।

तिम्बुङ पोखरी प्राकृतिक रूपमा अनुपम त छँदैछ, धार्मिक हिसाबले पनि अत्यन्त महत्त्वपूर्ण मानिन्छ। जनविश्वासअनुसार यहाँ वरदान मागेमा पूरा हुन्छ।

पौराणिक कथाअनुसार देवीदेवताहरू घना बस्तीका कारण स्वच्छ वातावरण खोज्दै हिँड्दा यो स्थानमा बसोबास गर्न पुगेका थिए। त्यसैले पनि यो ठाउँ आध्यात्मिक रूपमा पवित्र मानिन्छ।

पोखरीको पानी स्वच्छ, नीलो र मनमोहक देखिन्छ। हिमाली हावापानी, अग्ला पहाड, शीतल बतास र सुगन्धित जडीबुटीको सुगन्धले यहाँको वातावरणलाई स्वर्गीय बनाएको छ। सरकारले २०७५ मा नेपालका एक सय नयाँ पर्यटन गन्तव्य पहिचान गर्दा तिम्बुङ पोखरीलाई पनि समावेश गरेको थियो।

त्यसयता यहाँ आउने पर्यटकको सङ्ख्यामा केही वृद्धि भए पनि अझै पनि पर्याप्त लगानी र प्रचारप्रसारको अभावमा धेरै पर्यटक पुग्ने गरेका छैनन्।

स्थानीय पालिकाले आफ्नै स्रोतबाट यो क्षेत्रमा केही लगानी गर्न सकेमा पर्यटनबाट आन्तरिक आम्दानीको राम्रो स्रोत बन्न सक्ने देखिन्छ।

तिम्बुङ पोखरीको संरक्षण र प्रवर्द्धनका लागि एक संरक्षण समिति गठन गरिएको छ। समितिले तीनै तहका सरकारसँग समन्वय गरेर विकासका केही काम अघि बढाइसकेको छ। पाँचथर र ताप्लेजुङ दुवै जिल्लाबाट पोखरी पुग्न पैदल मार्ग निर्माण गरिएको छ। पोखरीबाट ढुङ्गाको सोलिङ र सिँढी निर्माण गरिएको छ।

थप पूर्वाधार विकासका लागि आवश्यक समन्वय भइरहेको संरक्षण समितिका सल्लाहकार कैलाश राईले बताए।    
- दिलकुमार लिम्बू/रासस     

फागुन २४, २०८१ शनिबार १७:४०:१६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।