फ्राइडे रिलिज : सोलो रिलिज पाउँदा ‘होस्टेल ३’लाई डेढ सयभन्दा बढी शो

काठमाडौं : गत साताको बुधबार तीन नयाँ नेपाली फिल्म प्रदर्शनमा आएको सिने बजारमा यो साता भने एउटा मात्र फिल्म प्रदर्शन हुँदैछ।

आजबाट होस्टेल फिल्मको तेस्रो सिक्वेल ‘होस्टेल ३’ दर्शकमाझ आएको छ। अघिल्लो हप्ता आएका फिल्मले सोचेजस्तो व्यापार गर्न नसक्दा अनि सोलो रिलिज हुन पाउँदाको फिल्मले देशका मल्टिप्लेक्समा एक सय ५० भन्दा बढी शो पाएको छ।

आजको अकुपेन्सी र दर्शकको माग हेरेर हल सञ्चालकले भोलिका लागि शो उपलब्ध गराउँछन्। अहिलेसम्मको आँकडा अनुसार शनिबारका लागि पनि फिल्मले एक सय २५ भन्दा बढी शो पाउने देखिएको छ।

यद्यपि पहिलो दिनको ओपनिङ बम्पर भएमा भने फिल्मले अझै बढी शो पाउने निश्चित छ। युनिभर्सल सर्टिफिकेट पाएको फिल्म दुई घण्टा ४९ मिनेट लामो छ।

सशांक कँडेलको निर्देशनमा बनेको फिल्ममा पारस बम ठकुरी, रायहान गिरी, पदम तामाङ, आशिष घिमिरे, सिमरन पन्त, हेना नगरकोटी, सम पराजुली, प्रविन खतिवडा, उमर खान, दिनेश डिसी, सुवास गजुरेल, उत्तम केसी लगायतका कलाकार छन्।

गत हप्ता बुधबार प्रदर्शनमा आएको तीनमध्ये ‘लाज शरणम्’ र ‘फेरि रेशम फिलिलि’ले हलमा राम्रै दर्शक बटुल्दा ‘मायावी’ भने लगभग शून्यको अवस्थामा छ। आज ‘लाज शरणम्’ले देशभर एक सयको हाराहारीमा शो पाउँदा ‘फेरि रेशम फिलिलि’ले ४० भन्दा बढी शो पाएको छ।

त्यसैगरी महाशिवरात्रिबाटै प्रदर्शनमा आएको लभस्टोरी फिल्म ‘मायावी’ले आज ३० शो पाएको छ। अहिले पाएको शो सबै मल्टिप्लेक्सका शोहरु हुन्। सिंगल थिएटरको शो यसमा गणना गरिएको छैन।

यसका अलावा हलमा बलिउड फिल्म ‘क्रेजी’, ‘छावा’ र ‘सनम तेरी कसम’ तथा हलिउड फिल्म ‘क्याप्टेन अमेरिका’, ‘ओभरलर्ड’ र ‘मिकी १७’ प्रदर्शनमा छन्। 

फागुन २३, २०८१ शुक्रबार ०९:१४:४५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।