कागज उद्योगको उद्घाटन गर्दै प्रधानमन्त्रीले भने ‘अब अराजकता, बलमिच्याँइ र जालझेल चल्दैन'

महोत्तरी : प्रधानमन्त्री केपी शर्मा ओलीले मुलुकलाई आत्मनिर्भरताको बाटोमा लैजानुको विकल्प नभएको बताएका छन्।

महोत्तरीको गौशाला नगरपालिका–१, रामनगरमा ‘नेपाल पल्प एन्ड पेपर इण्डष्ट्रिज’को उद्घाटन गर्दै उनले औद्योगिक विकास र रोजगारी सृजनामा प्राथमिकता दिइने बताए। उद्योग आइएमई ग्रुपले स्थापना गरेको  हो।

‘अब हामी आत्मनिर्भरताको बाटोमा लाग्नुको विकल्प छैन। सहकार्यका माध्यमबाट युवाहरूले आँपको खेती विकास गर्न सक्छन्, यसमा प्रदेश सरकारहरू पनि अघि सरुन्।’

ओलीले निजी क्षेत्रको प्रयास बिना समृद्धि हासिल नहुनेमा सरकार स्पष्ट रहेको बताउँदै उनले कागज उद्योग स्थापनाले चुलो चौकोमा सीमित सर्वसाधारणले सीप सिक्नुका साथै रोजगारी सृजना हुने बताए।

आफ्नै कागज देशभित्र प्रयोग गर्ने अवसर र व्यापार घाटा सन्तुलनका लागि उद्योगले योगदान दिई आत्मनिर्भर बनाउन सहयोग गर्ने उनले बताए।

उनले हुलाकी राजमार्ग, सुनकोसी मरिनलगायतका योजना छिटो सम्पन्न गर्ने प्रतिबद्धता जनाए।

‘अब अराजकता, बलमिच्याँइ र जालझेल चल्दैन’ उनले भने।

फागुन २२, २०८१ बिहीबार २०:२७:३५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।