ग्रीनल्यान्ड नियन्त्रणमा लिने ट्रम्पको घोषणापछि प्रधानमन्त्री भन्छन्- ‘ग्रीनल्यान्ड कसैको पनि होइन’

एजेन्सी : ग्रीनल्याण्डका प्रधानमन्त्री मुटे बोरुप एगेडेले अमेरिकी राष्ट्रपति डोनाल्ड ट्रम्पको विरोध गरेका छन्।

बुधबार अमेरिकी संसदको संयुक्त सत्रलाई सम्बोधन गर्ने क्रममा ट्रम्पले ग्रीनल्यान्डलाई नियन्त्रणमा लिने घोषणा गरेपछि प्रधानमन्त्री एगेडेले ग्रीनल्यान्डलाई कसैले खरिद गर्न नसक्ने बताएका हुन्।

उनले सामाजिक सञ्जालमा भनेका छन्, ‘ग्रीनल्याण्ड हाम्रो हो भने। यसलाई कसैले पनि किन्न सक्दैन। ग्रीनल्यान्डका मानिसहरू न त अमेरिकी हुन् न डेनिस, तिनीहरू ग्रीनल्यान्डिक हुन्। अमेरिकाले यो बुझ्नु आवश्यक छ।’

ट्रम्पले बुधबारको संसदको संयुक्त सत्रलाई सम्बोधन गर्दै ग्रीनल्यान्डलाई नियन्त्रणमा लिएर त्यहाँका मानिसहरूले कहिल्यै कल्पना नगरेको उचाइमा पुर्याउने बताएका थिए।

ट्रम्पले पहिलेदेखि नै ग्रीनल्यान्डलाई अमेरिकी नियन्त्रणमा लिने कुरा गरिसकेका छन्।

ग्रीनल्याण्ड उत्तरी एट्लान्टिक महासागरमा अवस्थित एक टापु हो। यो डेनमार्कको नियन्त्रणमा रहेको एक स्वायत्त क्षेत्र हो। जसको आफ्नै प्रधानमन्त्री छ।

फागुन २२, २०८१ बिहीबार ०८:०१:३५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।