भारत र अष्ट्रेलियाबीचको सेमिफाइनल नयाँ पिचमा खेलाइने

काठमाडौं : च्याम्पियन्स ट्रफीको पहिलो सेमिफाइनलको भारत र अष्ट्रेलियाबीच खेल नयाँ पिचमा खेलाइने भएको छ।

दुबई अन्तर्राष्ट्रिय रंगशालामा नेपाली समयअनुसार दिउँसो २:४५ बजे खेलाइने खेल नयाँ पिचमा हुने क्रिकेट समाचारको वेबसाइट क्रिकबजले जनाएको छ।

क्रिकबजमा अनुसार यहाँ अहिलेसम्म खेलिएका तीन खेलका लागि तीन फरक पिच प्रयोग गरिएकोमा आज नयाँ विकेट तयार पारिएको हो।

जारी प्रतियोगितामा यहाँ दुवै टोली पहिलो पटक आमनेसामने हुँदैछन्। यी दुई टोली आईसीसी प्रतियोगिताको नकआउट चरणमा नवौं पटक आमनेसामने हुनेछन्।

अघिल्ला भिडन्तहरूमा दुवै टोलीले ४-४ ले जितेका थिए। यी दुई टोली अन्तिम पटक २०२३ को एकदिवसीय विश्वकप फाइनलमा आमनेसामने भएका थिए, त्यहाँ अष्ट्रेलियाले भारतलाई ६ विकेटले हराएको थियो।

दुबईको पिच पहिले फास्ट बलरहरूका लागि सहयोगी हुने गरेकोमा च्याम्पियन्स ट्रफीका लागि भनेर स्पिनर फ्रेन्डली पिच बनाइएका छन्।

यहाँ भएका यसअघिका तीन खेलमा पहिलो इनिङमा पेसरहरूलाई फाइदा पुग्दा दोस्रो इनिङमा स्पिनरहरू बलिया देखिएका छन्। प्रतियोगिताको तीन खेलमा पहिले ब्याटिङ गर्ने टोलीले एक खेल जित्दा पछ्याउने टोलीले २ खेल जितेको छ।

फागुन २०, २०८१ मंगलबार १४:१३:०९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।