प्रहरी अप्रेसनमाथि उकेरा अप्रेसन : ‘रक्सौलको साडी पसल’ मा भएको विशेष अप्रेसन नेपालमा बन्यो ‘टोखा’ सडक

काठमाडौं : २०७९ असोज ३ मा कागेश्वरी मनोहरा नगरपालिका वडा नम्बर ८ मा रहेको घर जानेक्रममा घर अगाडि नै सुटरले लखेट्दै गोली हानेर लाल मोहम्मदको हत्या भयो।

नेपालमा हुने गरेको जाली भारतीय रुपैयाँको कारोबारमा मोहम्मदको नाम जोडिँदै आएको थियो। उनको हत्या हुँदा भने उनी ‘एभेन्जर इन्टरप्राइजेज वर्ल्ड बेस्ट नामको गार्मेन्ट कम्पनी चलाएर बसेका थिए।

सर्लाहीका मोहम्मद जाली भारुको कारोबारमा संलग्न बलराम पुतवारको हत्यामा संलग्न पुष्टि भएसँगै उनी कारागारमा बसेर बाहिरिएका थिए। अन्तमा उनी पनि मारिए।

हत्या हुँदाको सिसिटिभी फुटेज फेला पारेको प्रहरीले अनुसन्धान गर्दै जाँदा संलग्नहरू नजिकैको गोठाटारको कोशीपारी लज एन्ड होटेलमा बसेको खुल्यो। त्यहीँ सम्भावित प्रमाणहरू खोज्दा क्लोज सर्किट टेलिभिजनको फुटेज फेला पर्यो जुन अनुसन्धानका लागि बलियो प्रमाण बन्यो। 

फुटेजमा एक व्यक्तिले मुखमा रुमाल बाँधेका थिए, अनि क्याप समेत लगाएकाले उनको पहिचान हुन सकेन। अर्का व्यक्तिको अनुहार खुल्ला थियो।

होटेलको कोठा बुक गर्नेक्रममा रिसेप्सनमा कैद भएको फुटेजको आधारमा अनुहार देखिएका व्यक्तिको पहिचान भयो नितिन मदन आरोरा जो परिवारसहित नेपालमा बस्दै आएका थिए। उनी प्रहरीमाझ हुन्डी कारोबारीको रूपमा सूचीकृत थिए। होटेलमा एक ब्याग फेला पर्यो। त्यसमा नितिनको परिचय खुल्ने कागजपत्रहरू थिए।

यो बिचमा प्रहरीले वीरगन्ज महानगरपालिका-१६ बस्ने २१ वर्षीय महोरम मियाँ, वीरगन्ज-१५ का १९ वर्षीय रेहान मियाँ र मकवानपुर बकैया गाउँपालिका-१ घर भई काठमाडौँको कपन फैकाचोक बस्ने २१ वर्षीया सुमी भन्ने सुस्मिता स्याङताङलाई सार्वजनिक गर्दै उनीहरू मोहम्मद हत्याका सहयोगी रहेको दाबी गरेको थियो।

काठमाडौँको लोलाङमा दुई वटा हतियार भेटियो। त्यहाँको एक घरमा समेत हत्यामा संलग्नहरू बसेको प्रहरीले दाबी गरेको थियो। कोठामा फेला परेको १ थान अटोमेटिक र अर्को कटुवा  पेस्तोल मोहम्मद हत्यामा प्रयोग भएको प्रहरीको दाबी थियो।

सिसिटिभी फुटेजमा देखिएका क्याप लगाएका अर्का व्यक्ति को थिए खुल्दै खुलेन। प्रहरीले उनी नै सुटर हुन् भन्न दाबी गर्यो।

OOO

२०८१ फागुन १८। काठमाडौँको टोखामा प्रहरीले गोली चलाएर एक भारतीय नागरिकलाई पक्राउ गरेको सूचना सार्वजनिक भयो। यसरी गोली हानेर पक्राउ गरिएका व्यक्तिको पहिचान खुल्यो गुड्डु पटेल। उनको गोडामा गोली लागेकाले उपचारका लागि ट्रमा अस्पतालमा भर्ना गर्यो प्रहरीले।

प्रहरीको दाबी अनुसार गुड्डु लाल मोहम्मद हत्याका प्रमुख सुटर हुन जो फरार थिए। काठमाडौँ उपत्यका अपराध अनुसन्धान कार्यालयका प्रमुख एसएसपी रमेश बस्नेत गुड्डुबारे कार्यालयले लामो समयदेखि अनुसन्धान गरिरहेको र उनी टोखामा रहेको सूचनाको आधारमा पक्राउ गर्न जाँदा अवरोध गरेपछि गोली हानेर नियन्त्रणमा लिएको दाबी गरे। प्रहरीले अस्पतालमा उपचाररत गुड्डुको तस्बिर समेत सार्वजनिक गर्यो।

कालो फितावाल चप्पल, खुइलिएको जिन्स पेन्ट र सामान्य सेतो सर्ट लगाएका उनको देब्रे गोडाको घुँडामुनि गोली लागेको देखिन्छ। उनको अवस्थाबारे बुझ्दा राष्ट्रिय ट्रमा सेन्टरका एक चिकित्सकले खतरामुक्त रहेको बताए।

उकेरासँग सुरक्षित रहेको गोठाटारको होटेलमा फेला परेको सिसिटिभी फुटेजमा क्याप लगाएको र मुख छोपेको व्यक्ति गुड्डु नै हुन् त? प्रहरीले सार्वजनिक गरेको तस्बिरकै आधारमा ठम्याउन सहज थिएन।

उकेराले केही सूत्रहरूसँग सम्पर्क गर्यो जो गुन्डुबारे जानकार थियो। स्रोतले उनको केही तस्बिरहरू उकेरालाई पठायो। उकेराले प्राप्त गरेको ती तस्बिरसँग गोठाटारको होटेलको सिसिटिभी फुटेजमा देखिएका व्यक्तिको हुलिया, शारीरिक बनावट हेर्दा उस्तै देखियो।

OOO

२०८१ वैशाख १७

‘नेपाल आइरहेको समयमा शङ्का लागि चेकजाँच गर्नेक्रममा भाग्ने प्रयास गरेपछि प्रहरीले गोली हानेर’ बब्लु पासवानलाई पक्राउ गर्यो। उनी सीमावर्ती रक्सौलमा बस्दै आएका थिए। राति करिब ११ बजे बीआर ०५ एल ६१३९ नम्बरको मोटरसाइकलमा लागू औषध तथा हातहतियारका साथ वीरगन्जतर्फ आइरहेको विशेष सूचनाको आधारमा जिल्ला प्रहरी कार्यालय पर्साबाट खटिएको प्रहरीको विशेष टोलीले उनलाई पक्राउ गरेको दाबी आयो।

उनीमाथि प्रहरीले दुई राउन्ड गोली हानेको थियो, त्यो पनि घुँडा आसपास। उनी विरुद्ध दायर भएको अभियोग पत्रमा उल्लेख भएको प्रहरी प्रतिवेदनको अंशमा उल्लेख भए अनुसार १०८१ वैशाख १६ मा आपराधिक क्रियाकलाप गर्ने उद्देश्यले अवैध हातहतियार सहित भारतीय नम्बर प्लेटको मोटरसाइकलमा भारतीय नागरिक जिल्ला पर्सा वीरगन्ज महानगरपालिका वडा नम्बर १६ भुटनदेवी मन्दिरको बाटो हुँदै वीरगन्ज बजारतर्फ प्रवेश गर्न लागेको भन्ने गोप्य सूचनाका आधारमा भुटनदेवी मन्दिरको बाटोमा निज व्यक्तिलाई पक्राउ गर्न चेक पोइन्ट खडा गरी चेकजाँच गर्ने क्रममा बेलुका ११ बजे भारतीय मोटरसाइकल रोक्न खोज्दा गोली चलेको उल्लेख छ।

दक्षिण भारत तर्फबाट आएको मोटरसाइकल रोक्न खोज्दा अचानक मोटरसाइकल चालकले पेस्तोल निकाली प्रहरीतर्फ ताकी फायर गर्ने प्रयास गरेकोले आत्मरक्षाको लागी जवाफी कारबाही स्वरूप २ राउन्ड गोली फायर गरेको प्रहरी प्रतिवेदनमा उल्लेख छ।

‘पछि नाम थर खुल्न आएका बब्लु पासवान भन्ने गणेश कुमारको बायाँ खुट्टामा गोली लागी मोटरसाइकल सहित लडेपछि निजको साथमा रहेको २ राउन्ड गोली लोड रहेको म्याग्जीन सहितको पेस्तोल भुईँमा झरेको तथा निजको साथबाट खैरो हेरोइन जस्तो देखिने पदार्थ ४९ ग्राम, मोबाइल थान २ र मोटरसाइकलमा रहेको झोलाबाट लागूऔषध गाँजा ८८० ग्राम फेला परेकोले बरामद गरी आवश्यक कारबाहीको लागी दाखिला गरेको भन्ने ब्यहोराको प्रहरी वरिष्ठ नायब निरीक्षक रमेश बजगाईँ समेतको प्रतिवेदन’ अभियोग पत्रमा उल्लेख छ।

घाइते पासवानलाई वीरगन्जस्थित नारायणी अस्पतालमा भर्ना गरियो। अहिले उनी अवैध हतियार र लागुऔषध कारोबारमा पुर्पक्षका लागि वीरगन्ज कारागारमा छन्।

अभियोग पात्रमा समेटिएको उनको बयानमा भारत तथा नेपालमा व्यक्ति अपहरण र फिरौतीको घटनामा संलग्न रहेको भन्दै प्रहरीले बरामद गरेको पेस्तोल रक्सौलका बन्टीकुमारसँग किनेको र खैरो हेरोइन हेटौँडाका रवीन्द्र पाण्डेले मगाएकाले भारतबाट बोकेर आएको उल्लेख छ। अन्य केही उल्लेख छैन।

पासवान पक्राउ परे लगत्तै पर्सा प्रहरीले सार्वजनिक गरेको दाबीमा उनलाई काठमाडौँको गोठाटारमा मारिएका लाल मोहम्मदको हत्यासँग जोडिएको थियो। प्रहरीले गरेको दाबी अनुसार उनी लाल मोहम्मद हत्याको मुख्य योजनाकार थिए।

आइतबार बेलुका टोखामा पक्राउ परेको भनिएका गुड्डुलाई पनि प्रहरीले लाल मोहम्मदको हत्यामा जोडेको छ। प्रहरीको दाबी अनुसार हत्याको योजना बनाउने पासवान हुन् भने कार्यान्वयन गर्ने सुटर गुड्डु हुन्।

तर , न विशेष ब्युरोको चासो, न काठमाडौँ प्रहरीको

पर्सा प्रहरीले पासवानविरुद्ध लाल मोहम्मदको हत्याको योजनाकार भएको दाबी गर्यो। यता लाल मोहम्मदको हत्या सम्बन्धमा प्रहरी वृत्त बौद्धले गरेको अनुसन्धानको मिसिलमा समेत उनको नाम रहेको खुल्यो। त्यो बेलामा उनी फरार थिए। फरारै उल्लेख गरियो।

वैशाखमा पासवान पक्राउ परेपछि उनीमाथि हत्यामा संलग्नताबारे अनुसन्धान गरेर पूरक अभियोग पत्र लैजानुपर्ने हो। हत्याको घटनास्थल काठमाडौँ भएकाले यसको जिम्मेवारी काठमाडौँ प्रहरीकै हो। तर काठमाडौँ प्रहरी अनि घटनास्थल रहेको बौद्ध वृत्तले अहिलेसम्म पासवानलाई काठमाडौँ झिकाएर बयान समेत लिएको देखिएन।

पासवान संलग्न घटना अन्तर्देशीय हो। यस्तो प्रकृतिको सङ्गठित अपराधको अनुसन्धान गर्न प्रहरीमा डिआइजीको नेतृत्वमा विशेष ब्युरो छ। पासवानबारे अहिलेसम्म ब्युरोले समेत चासो लिएको देखिएन।

अनुसन्धान स्रोतका अनुसार पासवान पक्राउ परेपछि उनीसँग लाल मोहम्मदको हत्यामा संलग्नताबारे पर्सा प्रहरीले बयान लिएको थियो। बयानमा उनले लाल मोहम्मद जाली भारुको कारोबारमा संलग्न रहेर भारत विरुद्ध गतिविधि गरेकाले हत्या योजना बनाएको सहयोगीहरूलाई नेपाल पठाएको खुलाएका थिए। उनले त्यही बेलामा गुड्डुसहितको नाम लिएको स्रोतको दाबी छ।

पर्सा प्रहरीले मोहम्मद हत्याको नालीबेली उतारे पनि घटनास्थल काठमाडौँ भएकाले मिसिलमा ती विवरण उल्लेख गरेन। लागुऔषध र अवैध हतियारमात्र उल्लेख गर्यो। त्यसैमा मुद्दा चल्यो। चासो दिनुपर्ने विशेष ब्युरो अनि काठमाडौँ प्रहरीले पनि पासवानबारे थप अनुसन्धानमा चासै दिएन।

यी दुई त पक्राउ परे तर लाल महम्मद हत्याका आरोपी मेरिना तिवारी, राजु भन्ने दिनेश, नितिन खान भन्ने नितिन मदान र मोहम्मद नेजामद्दीन अझैँ फरार छन्।  

बब्लु श्रीवास्तव, पासवान र गुड्डुको सम्बन्ध

गुड्डु पक्राउबारे काठमाडौँ उपत्यका अपराध अनुसन्धान कार्यालयका प्रमुख एसएसपी बस्नेतसँग उकेराले जिज्ञासा राख्दा उनले टोखामा फेला परेको दाबी गरे।

तर उकेराको सोधखोजमा उनी काठमाडौँको टोखामा नभई भारतको रक्सौलमा पक्राउ परेको देखियो। विश्वस्तस्रोतले उकेरालाई दिएको जानकारी अनुसार गुड्डु दुई वर्षदेखि प्रहरीको रडारमा थिए। अन्तर्देशीय अपराधको अनुसन्धानमा चासो राख्ने केही प्रहरी अधिकृतहरूले उनलाई पक्राउ गर्ने प्रयास निरन्तर जारी राखेका थिए। तर त्यो दिन जुर्यो शनिवार।

नेपालमा आफू वान्टेड रहेकोबारे जानकार गुड्डु नेपाल आएर किन जोखिम मोल्थे र। उनी रक्सौलतिरै बढी सक्रिय थिए। प्रहरीले बब्लु पासवानसँग गुड्डुको सम्बन्धबारे गरेको दाबी उकेराको खोजमा पनि पुष्टि भयो।

पासवान र गुड्डुको सम्बन्ध अगाडि अर्का भारतीय ग्याङस्टर बब्लु श्रीवास्तवबारे केही उल्लेख गरौँ।

उकेराले प्राप्त गरेको विवरण अनुसार लखनउको जेलमा रहेका बब्लु श्रीवास्तव यो समूहका मुखिया हुन्। कारागारमा रहेका उनले नेपाल लक्षित खुफिया अप्रेसनमा भारतीय सुरक्षा एजेन्सीहरूका लागि सहयोगीको भूमिका निभाउँदै आएका छन्।

यस अगाडि काठमाडौँमा भएको मिर्जा दिलसादबेग, जमिम शाह लगायतकाको हत्या अनि केन्द्रीय कारागारमै युनुस अन्सारीको हत्या प्रयासको घटनामा समेत बब्लु श्रीवास्तव जोडिएकै थिए। युनुसको हत्या प्रयासकोक्रममा पक्राउ परेका मनमित सिंह भाटियाबाट प्रहरीले बब्लु श्रीवास्तवबारे महत्त्वपूर्ण सूचना लिएको थियो।

‘उसको बब्लु श्रीवास्तवमात्रै हैन सिधै छोटा राजनसँग सम्बन्ध देखिएको थियो,’ भाटियाबारे अनुसन्धानमा संलग्न स्रोतले उकेरासँग भन्यो ‘अनुसन्धानकोक्रममा ओ मेरा बच्चा है, ख्याल रखना’ भन्दै छोटा राजनले अनुसन्धान अधिकारीलाई नै धम्क्याएका थिए।’

लाल मोहम्मदको हत्या पनि उनै बब्लु श्रीवास्तवसँग जोडिएको थियो। बब्लुको नेटवर्कबारे जानकारस्रोतका अनुसार उनको योजना अनुसार काम गर्न लखनउमा सञ्चय तिवारी उर्फ डिके नामका व्यक्ति सक्रिय छन्। बब्लुको जेल बाहिरका सबै काम उनैले गर्दै आएका छन्।

डिकेको योजना अनुसार काम गर्ने प्रमुख व्यक्ति हुन बब्लु पासवान। उनी मुख्य रूपमा रक्सौल क्षेत्रमा सक्रिय थिए। रक्सौलमा औषधी पसलको आवरणमा नेपालतिर नियन्त्रित लागु औषधी पठाउने प्रमुख व्यक्ति नै उनी भएको देखियो।

उनी नेपाल अनि भारतमा समेत व्यापारी अपहरण गरेर फिरौती सङ्कलनमा समेत सक्रिय देखिएका थिए। २०७३ जेठ १३ मा भएको सुरेश केडियाको अपहरणको अनुसन्धानमा मुख्य योजनाकार उनी नै देखिएको थियो।

आफ्नो अपहरण र लागु औषधको धन्दाको संरक्षणका लागि उनी डिकेमार्फत आउने निर्देशन अनुसार नेपालमा विशेष अप्रेसनको नेतृत्व गर्थे।

भारतीय सुरक्षा एजेन्सीले ‘भारत विरोधी गतिविधिमा संलग्न, पाकिस्तानी खुफिया एजेन्सीको एजेन्ट’ भन्दै ट्याग लागेकाहरूको सफायका लागि भारतीय सुरक्षा एजेन्सीले आपराधिक व्यक्ति परिचालन गरेर नेपालमा चलाउने ‘सफाया अभियान’ को मुख्य सहयोगी भए बापत उनले रक्सौलमा प्रोटेक्सन पाउँथे नै लागु औषधको धन्दा पनि निर्बाध गर्न पाउँथे।

उनै बब्लु पासवानको मुख्य सहयोगी थिए गुड्डु। रक्सौलमा समेत आधा दर्जन बढी आपराधिक रेकर्ड रहे पनि उनी पक्राउ पर्दैनथे। सो प्रोटेक्सनवापत उनी बब्लु पासवानको निर्देशन अनुसार सुटरको काम गर्थे। लाल मोहम्मदको हत्या पनि त्यही रणनीति अन्तर्गत भएको देखिन्छ।

‘रक्सौलको साडी पसल बन्यो टोखा’

नेपाल-भारत सीमा क्षेत्रको नेपाली भूभागमा पक्राउ पर्ने अधिकांश मोस्ट वान्टेड क्रिमिनल विशेष प्रहरी अप्रेसनको नतिजा हुन्न, भारतीय सुरक्षा एजेन्सीका सदस्यको ‘उपहार’ हुन्छ।

अनि उस्तैगरि भारतको मोस्ट वानेटेड खोजीमा रहेकाहरू भारतीय सीमा क्षेत्र अनि अझ रेल्वे स्टेसनमा पक्राउ पर्ने अधिकांश घटना पनि उसैगरि नेपाली सुरक्षा एजेन्सीको ‘उपहार’ नै हुन्छ।

यस अगाडि यस्ता धेरै ‘उपहार’आदान प्रदान भइसकेका छन्। उकेराको सोधखोजमा वीरगन्जमा पक्राउ परेका बब्लु पासवान हुन् या काठमाडौँको टोखाको सडकमा भेटिएका गुड्डु हुन् यी दुवै यसैगरी नेपाल प्रहरीले पाएको ‘उपहार’ देखियो।

विश्वस्त स्रोतका अनुसार गुड्डु टोखामा हैन रक्सौलमा समातिएका हुन्। रक्सौलको एक साडी पसलको आवरणमा भारतीय प्रहरीले तीन दिनदेखि निगरानी राखेर शनिवार गुड्डुलाई नियन्त्रणमा लिएर भारतीय सीमा कटाएर नेपालका सुरक्षा एजेन्सीका सदस्यलाई ‘उपहार’ दिएका थिए।

यो उपहारका लागि भारतीय सुरक्षाकर्मीलाई बनाउन उपत्यका अपराध अनुसन्धान कार्यालयमा कार्यरत एक प्रहरी जसले भारतमा आइपिएस तालिम लिएका थिए त्यो सम्बन्धले सघाएको देखियो।

वीरगन्जमा जसरी मध्यरात पासवान समातिए उही शैलीमा टोखामा राती नै गुड्डु समातिए। अर्को संयोग दुवैको गोडामा गोली हानियो। तेस्रो संयोग दुवै मोहम्मदको हत्याको घटनामा जोडिए।

जब जब एकातिरबाट ‘उपहार’ आउँछ अर्कोतर्फबाट पनि उपहार जान्छ। यो अहिलेदेखिको प्रक्रिया पनि हैन, उहीले देखिको हो। यसले केही समयमा भारतीय सीमा वा दिल्लीको रेल्वे स्टेसनमा भारतको मोस्ट वान्टेडको सूचीमा रहेको तर नेपालमा रहेकाले पक्राउ गर्न नसकिएकाहरू पक्राउ पर्ने संयोग जुर्ने सम्भावना देखिन्छ।

पछिल्लो समय नेपालमा जाली भारतीय रुपैयाँको कारोबार ठप्प छ। तर हिजोका दिनमा जाली भारुको कारोबारमा संलग्न रहेकाहरू र भारतीय सुरक्षा एजेन्सीको खोजीमा रहेकाहरू छन् नै।

विश्वस्त स्रोतका अनुसार भारतीय सुरक्षा एजेन्सीले हिजोका दिनमा जाली भारु कारोबारमा संलग्नको सफाया अभियान छाडिसकेको छैन।

भारतीय सुरक्षा एजेन्सीको खोजीको सूचीमा इल्ताफ हुसेन अन्सारी पहिल्यैदेखि छन्। उनी यस अगाडि जाली भारुको कारोबारमा संलग्नतामा जेल समेत पुगिसके। लाल मोहम्मद यी नै इल्ताफ समूहका सदस्य थिए।

अर्का छन् निरुल्लाह मोहम्मद। उनीमाथिको आरोप पनि त्यही नै हो। शेरु अनि युनुस अन्सारी पनि भारतीय सुरक्षा एजेन्सीको खोजीकै सूचीमा रहेकाहरू हुन्।

पासवान अनि गुड्डुको साटो यीमध्ये कुनै ‘उपहार’ बन्ने त हैनन् ?

फलोअप स्टोरीहरु

फागुन १९, २०८१ सोमबार १७:५५:३९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।