वर्षको तेस्रो महिना लाग्दा समेत वार्षिक क्यालेन्डर निकाल्न क्यान असफल, एनपीएलको खर्च विवरण खै?

काठमाडौं : नेपाल क्रिकेट संघ (क्यान)को बोर्ड बैठक फागुन १६ गते बस्यो।

बैठकमा नेपाली राष्ट्रिय पुरुष टोलीको मुख्य प्रशिक्षक नियुक्ति, वार्षिक क्यालेन्डर, नेपाल प्रिमियर लिग (एनपीएल) र नेपाल क्रिकेटको आगामी योजनाबारे छलफल भयो।

मुख्य प्रशिक्षक नियुक्तिको सम्बन्धमा क्यानले गत फागुन ३ गते विज्ञापन आह्वान गरेकोमा आवेदनको अन्तिम मिति फागुन १६ गतेसम्मका लागि तोकेको थियो। यस अवधिमा धेरै नै ठूला नामहरूको आवेदन परेको क्यानक सचिव पारस खड्काले जानकारी दिए।

मुख्य प्रशिक्षक र वार्षिक क्यालेन्डर
‘दुई/चार वटा एक्साइटिङ नामहरू पनि छन्। बोर्ड बैठकले नीतिगत रूपमा निर्णय गरिसकेपछि अनाउन्समेन्ट गर्छौँ’, पारसले भने।

प्रधानमन्त्री कपसम्ममा नयाँ प्रशिक्षक ल्याउने तयारीमा क्यान रहेको देखिन्छ। त्यसका लागि अहिले छनोट समितिले काम गरिरहेको क्यानका प्रवक्ता छुम्बी लामाले जानकारी दिए।

उनले उकेरासँग भने, ‘कति जनाको आवेदन पर्यो र सर्ट लिस्टको बारेमा हाम्रो मुख्य प्रशिक्षक छनोट समितिले काम गर्दैछ। हामी एक/दुई दिनमै त्यस बारेमा सार्वजनिक सूचना मार्फत नै जानकारी दिनेछौँ।’

आफ्नो कार्यकाललाई पारदर्शी र योजनाबद्ध बनाउने दाबी गर्दै आएका सचिव खड्काले सन् २०२५ लागेको तीन महिना लागिसक्दा पनि वार्षिक क्यालेन्डर सार्वजनिक गर्न सकेका छैनन्।

यसअघि क्यालेन्डर बनाइसकेको र बोर्डबाट पारित गराएर सार्वजनिक गर्न मात्र बाँकी रहेको बताइरहेको क्यान बैठक सकिएको तीन दिन हुँदा समेत क्यालेन्डर निकाल्न अनेक बहाना गरिरहेको छ।

‘१६ गते बोर्ड बैठक बस्यो। सबै अहिले कम्पाइल हुँदैछ। हामी केही दिनमै सार्वजनिक गर्नेछौँ’, प्रवक्ता लामाले बताए।

एनपीएलको खर्च विवरण खै?
यसका अलावा नेपाल प्रिमियर लिग भएको तीन लागिसक्दा पनि क्यानले त्यसको खर्च विवरण सार्वजनिक गर्न सकेको छैन।

बोर्ड बैठकमा पनि पारस नेतृत्वको आयोजक समितिलाई यसको विवरण दिन आलटाल गर्यो। मिडियामा ब्रान्ड भ्यालु अमूल्य रहेको बताइरहने पारस नेतृत्वको टोलीले त्यहाँ पनि खर्चको बारेमा स्पष्ट आँकडा प्रस्तुत गर्न नसकेको बोर्डका एक सदस्यले बताए।

उकेराले एनपीएलको खर्च विवरण सार्वजनिक गर्नेबारे प्रश्न गर्दा क्यानका प्रवक्ता लामाले यसबारेमा पनि कुरा भइरहेको आलटाले जवाफ दिए।

उनले भने, ‘यो कुरा छलफलमै छ। सार्वजनिक गर्ने कुरा मात्रै ठूलो होइन, सेटलमेन्ट गर्नुपर्यो। पार्टी पेमेन्ट उठाउनुपर्यो। विभिन्न भेन्डरलाई तिर्नुपर्यो। यो विषयमा बोर्ड बैठकमा पनि कुरा भएको छ।’

यस विषयमा पारसले सार्वजनिक मिडियामा यसको भ्यालू अमूल्य रहेको बताउँदै आएका पारसले अहिले लगानी र खर्च मात्र भएको बताउने गर्छन्।

प्रशिक्षक र खेलाडीबीच मतभिन्नतामा महिला क्रिकेट
घरमै खेलेका छ वटा टी-२० क्रिकेटमा पराजित भएपछि नेपाली राष्ट्रिय महिला क्रिकेटको टोलीका लागि पनि संघले विदेशी प्रशिक्षक र फिटनेस ट्रेनर राख्ने तयारी गरेको छ। यद्यपि महिला क्रिकेटको धैर्यता गर्नुको विकल्प नभएको क्यानका पदाधिकारी बताउँछन्।

‘महिला क्रिकेटले अलिकति धैर्यता राख्नुपर्छ। यसमा लगानी गर्नुपर्ने धेरै पक्षहरू छ। कोचिङ युनिटका साथै फिजिकल र फिटनेस ट्रेनर उपलब्ध गराउँदै छौँ। परेको खण्डमा विदेशी प्रशिक्षक पनि ल्याइन्छ’, सचिव खड्काले भने।

महिला टिमका मुख्य प्रशिक्षक मनोज कटुवाल र खेलाडीहरू बीच पनि ड्रेसिङ रुममै मतभिन्नताको घटना नौलो भइसकेको छैन। थाइल्यान्ड र नेदरल्यान्डसँगको त्रिदेशीय महिला क्रिकेट खेलमा टिमकी कप्तान इन्दु बर्माले विदेशी प्रशिक्षक ल्याउन ढिला बताउँदा प्रशिक्षक कटुवालले आफ्नो फिटनेस र फिल्डिङ नसुधारे पशुपतिनाथले पनि बचाउन नसकिने प्रतिक्रिया दिएका थिए।

प्रधानमन्त्री कपको तयारी
नेपाली क्रिकेटमा घरेलु क्रिकेटको रूपमा रहेको प्रधानमन्त्री कप क्रिकेट यही मार्च ८ तारिखदेखि लुम्बिनी प्रदेशमा हुँदैछ। पहिलो पटक क्यानले पूर्ण रूपमा काठमाडौंबाहिर प्रधानमन्त्री कप गर्दैछ।

यसका लागि लुम्बिनी प्रदेशमा रहेका एक्ट्राटेक ओभल क्रिकेट मैदान, लमही क्रिकेट मैदान र भैरहवा क्रिकेट मैदान प्रयोग हुँदैछन्। यही प्रतियोगिताका लागि भनेर एक्ट्राटेक क्रिकेट मैदानमा तीव्र गतिमा काम भइरहेको छ।

त्यहाँ फ्लडलाइट समेत राखिएको अवस्थामा प्रधानमन्त्री कप फ्लडलाइटमा हुनसक्छ भन्ने प्रश्न समेत उब्जिएको छ। जसको जवाफमा क्यानका प्रवक्ता लामाले अहिलेकै अवस्थामा त्यस्तो सम्भावना नरहेको बताए।

उनले थपे, ‘उहाँहरू फ्लडलाइटको परीक्षणको क्रममा हुनुहुन्छ। अहिलेका लागि हामीले प्रधानमन्त्री कपलाई फ्लडलाइटमा गराउने सोचेका छैनौँ।’

फागुन १९, २०८१ सोमबार १२:४३:१७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।