बेलायतले युक्रेनलाई २२ हजार करोडको एयर डिफेन्स मिसाइल सहयोग गर्ने

एजेन्सी : बेलायतले युक्रेनलाई २२ हजार करोड रुपैयाँ सहयोग गर्ने भएको छ।

पाँच हजार एयर डिफेन्स मिसाइल किन्न युक्रेनलाई उक्त सहयोग रकम दिन लागेको प्रधानमन्त्री केयर स्टारमरले जानकारी दिए।

यी मिसाइलहरू बेलायतको बेलफास्टमा निर्माण गरिने भएकाले रक्षा क्षेत्रमा रोजगारी बढ्ने उनको तर्क छ।

एक दिनअघि उनले जेलेन्स्कीलाई ३८ हजार करोड रुपैयाँ ऋण दिने कुरा गरेका थिए। यो ऋण दिँदै गर्दा उनले अमेरिका धेरै दशकदेखि हाम्रो विश्वसनीय साझेदार रहेको छ र भविष्यमा पनि यस्तै रहने विश्वास व्यक्त गरे।

युक्रेन युद्धको मुद्दामा युरोपेली देशहरूको रक्षा शिखर सम्मेलन पछि बेलायती प्रधानमन्त्रीले यी कुराहरू भनेका हुन्।

यस बैठकमा १५ देशका राष्ट्र प्रमुखहरू, टर्कीका विदेशमन्त्री, नाटोका महासचिव, युरोपेली संघका अध्यक्ष र युरोपेली परिषद्का सदस्यहरू उपस्थित थिए।

बैठकपछि स्टारमरले सरकारको पहिलो प्राथमिकता बेलायती जनतालाई सुरक्षा प्रदान गर्नु र उनीहरूको हितको रक्षा गर्नु भएको बताए।

उनले थपे, ‘हाम्रो प्रयास युक्रेनलाई बलियो स्थितिमा राख्नु हो। हामी युक्रेनको लागि हाम्रो समर्थन दोब्बर गर्दैछौं।’

स्टारमरले शिखर सम्मेलनमा नेताहरूले युक्रेनलाई सैन्य सहायता जारी राख्न र रूसमाथि आर्थिक दबाब बढाउन सहमति जनाएको बताए।

फागुन १९, २०८१ सोमबार ०७:४१:५३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।