२०१४ को विश्वकपपछि मन्त्री बन्ने प्रस्ताव आएको थियो : पारस खड्का

काठमाडौं : नेपाल क्रिकेट संघका सचिव पारस खड्काले २०१४ पछिको विश्वकप खेलिसकेपछि मन्त्री बन्ने प्रस्ताव आएको बताएका छन्। पोखरामा जारी नेपाल लिट्रेचर फेस्टिभलको ‘फ्री हिट’ सेसनमा उनले यस्तो बताएका हुन्।

‘२०१४ को विश्वकप खेलेपछि क्रिकेट र क्रिकेटरहरुको नाम चर्चामा आयो। व्यक्तिगत रूपमा मलाई धेरै ठाउँमा धेरै पटक पार्टीको सदस्यता लिन प्रस्ताव आयो। त्यसका अलावा वडाध्यक्ष, मेयर र मन्त्री बन्नेसम्मको प्रस्ताव आयो।’

त्यतिबेला उनी नेपाली राष्ट्रिय क्रिकेट टोलीको कप्तान थिए।

आफ्नो लागि नेपाली क्रिकेट पहिलो प्राथमकिता भएको भन्दै उनले सदस्य सचिव बन्ने नसोचेको बताए। उनले आफूप्रति देखाएको विश्वासका लागि कृतज्ञता व्यक्त गर्दै नेपाललाई टेस्ट राष्ट्र नबनाएसम्म म निरन्तर रुपमा पूर्ण रूपमा दत्तचित्त भएर लागिरहने बताए।

यद्यपि उनले नेपाल टेस्ट राष्ट्र भएपछि खेलकुदका माथिल्लफो क्षेत्रमा जानसक्ने संकेत गरे।

आफू खेलाडी भएको समयमा क्रिकेट संघविरुद्ध नारा लगाएको स्मरण गर्दै उनले अहिले नारा लगाउने शैली परिवर्तन भएको टिप्पणी गरे।

उनले थपे, ‘सबैलाई व्यक्तिगत स्वतन्त्रता छ। नारा कसरी लगाउने त! फेसबुकमा स्टाटस लेखेर हुन्छ, ईमेल लेखेर हुनसक्छ। सामाजिक सञ्जाल छ। नारा के को लागि र कसको लागि भन्ने कुरा हो।’

फागुन १८, २०८१ आइतबार १४:२२:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।