टिकटकभर फिल्म देखिन थालेपछि बौद्धिक सम्पत्ति संरक्षण गर्न ‘लाज शरणम्’ टोलीको अपील

काठमाडौं : आफ्नो चलचित्र ‘लाज शरणम्’का दृश्यहरू टिकटकभरी छरप्रष्ट भएपछि निर्देशक कुमार कट्टेलसहितका कलाकारहरूले बौद्धिक सम्पत्ति संरक्षणका लागि अपील गरेका छन्।

दर्शकहरूबाट प्राप्त भएको सकारात्मक प्रतिक्रियाप्रति आभार व्यक्त गर्दै कट्टेलले चलचित्रका दृश्य तथा संवादहरू अनधिकृत रूपमा सामाजिक सञ्जालमा सार्वजनिक हुँदा चिन्तित भएको बताएका छन्।

निर्देशक कट्टेलले सामाजिक सञ्जालमार्फत चलचित्र हलभित्र फिल्मका दृश्य वा संवाद रेकर्ड गर्नु गैरकानूनी भएको स्मरण गराएका छन्।

‘चलचित्रका दृश्य तथा संवादहरू सामाजिक सञ्जालहरूमा छाउनु लगानीकर्ता, सर्जक र कलाकार कसैका लागि सुखद पक्ष होइन’, कट्टेलले भनेका छन्।

उनले सबै सामाजिक सञ्जाल प्रयोगकर्ताहरूलाई चलचित्रको अनधिकृत प्रयोग नगर्न र नेपाली चलचित्र उद्योगको विकासमा सहयोग गर्न अपील गरेका छन्।

आफ्नो पोस्टमा कट्टेलले रचनात्मक एवं सिर्जनात्मक सुझावहरूको स्वागत गर्दै दर्शकहरूबाट निरन्तर साथ र सहयोगको अपेक्षा गरेका छन्।

‘लाज शरणम्’ गत बुधबारबाट प्रदर्शनमा आएको छ। फिल्मले सँगै प्रदर्शनमा आएका दुई फिल्म ‘मायावी’ र ‘फेरि रेशम फिलीली’भन्दा धेरै दर्शक बटुल्न सफल भएको छ।

फागुन १८, २०८१ आइतबार १३:३४:१४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।