‘हाइ भोल्टेज’ बहसपछि जेलेन्स्कीलाई युरोपको समर्थन, लन्डनमा २७ नेताको आपतकालीन बैठक बस्दै
एजेन्सी : अमेरिकी राष्ट्रपति डोनाल्ड ट्रम्प र युक्रेनी राष्ट्रपति जेलेन्स्कीबीच ह्वाइट हाउसमा भएको हाइ भोल्टेज बहसपछि कुटनीतिक समीकरणहरू द्रुत गतिमा परिवर्तन भइरहेका छन्।
युरोपेली संघ युक्रेनको समर्थनमा एकजुट भएको छ। जेलेन्स्की शनिबार अमेरिकाबाट सिधै लन्डन आइपुगेका थिए। साँझ अबेर उनले बेलायती प्रधानमन्त्री केयर स्टारमरलाई भेटे।
स्टारमरले युक्रेनको समर्थनमा आइतबार हतारमा युरोपेली नेताहरूको आपतकालीन बैठक बोलाएका छन्। जर्मनी, फ्रान्स र इटाली लगायत २७ देशका नेताहरूले यसमा भाग लिनेछन्।
यसैबीच, अमेरिकी राष्ट्रपति डोनाल्ड ट्रम्पले ह्वाइट हाउसमा पत्रकारहरूसँग कुरा गर्दै जेलेन्स्कीलाई युद्धप्रेमी भएको आरोप लगाए। उनले युक्रेनले कुनै पनि हालतमा रुस विरुद्ध युद्ध जित्न नसक्ने बताए।
यो बहस र छलफलले नेटोको अन्त्य हुनुसक्ने बताइएको छ। यसअघि नै ट्रम्पले अमेरिका नेटोबाट फिर्ता हुनेबारे बताइसकेका छन्। उनले युरोपेली देशहरूले नेटोमा आफ्नो कोटाको खर्च समेत नगरेको आरोप लगाइसकेका छन्।
अमेरिकाले नेटो छोड्ने सम्भावनाको बारेमा नेटो प्रमुख मार्क रुटले जेलेन्स्कीले ट्रम्पसँग सम्बन्ध सुधार गर्नुपर्नेमा जोड दिए।
युरोपेली संघका उपाध्यक्ष काजा कालासले ‘स्वतन्त्र संसार’लाई अब नयाँ नेता चाहिएको बताए। यसको अर्थ अब युक्रेन युद्धको नाममा अमेरिकासँगको सम्बन्ध घटाउने प्रयासमा युरोपेली संघ अगाडि बढ्नेछ। ट्रम्पले पहिले नै ईयुमा २५ प्रतिशत कर लगाउने घोषणा गरिसकेका छन्।
फागुन १८, २०८१ आइतबार १२:३६:५६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
