ट्रम्प र भान्सको हप्कीअघि जेलेन्स्कीलाई सोधिएको थियो कपडाबारे प्रश्न- ‘के तपाईंसँग सुट छ?’
एजेन्सी : अमेरिकी राष्ट्रपतिको कार्यालय ह्वाइट हाउसमा युक्रेनका राष्ट्रपति भोलोडिमिर जेलेन्स्कीको कपडालाई लिएर प्रश्न गरिएको छ।
अमेरिकी राष्ट्रपति डोनाल्ड ट्रम्प र उपराष्ट्रपति जेडी भान्ससँगको बहस हुनुभन्दा अघि जेलेन्स्कीलाई उनको कपडाबारे एक पत्रकारले प्रश्न गरेका थिए।
‘तपाईं किन सुट लगाउनुहुँदैन? के तपाईंसँग सुट छ? धेरै अमेरिकीहरूले तपाईंलाई राष्ट्रपति कार्यालयको गरिमाको सम्मान नगरेको गुनासो गरेका छन्’, उनलाई प्रश्न गरिएको थियो।
यसको जवाफमा जेलेन्स्कीले भने, ‘युद्ध समाप्त भएपछि म यस्तै लुगा लगाउनेछु। सायद तपाईंहरूको जस्तै केही, सायद केही राम्रो, सायद केही सस्तो।’
यो प्रश्न दक्षिणपन्थी मिडिया नेटवर्क रियल अमेरिकाज भ्वाइसका राष्ट्रपति भवनका प्रमुख संवाददाता ब्रायन ग्लेनले जेलेन्स्कीलाई सोधेका थिए।
जेलेन्स्कीले सामान्यतया युक्रेनको विशिष्ट प्रतीक अंकित स्वेटशर्ट लगाउँछन्। विश्वका प्रमुख नेताहरूसँगको बैठकमा पनि उनी उस्तै लुगा लगाएको देखिन्छ।
यो प्रश्नपछि राष्ट्रपति कार्यालयमा भएको बहसमा ट्रम्प र भान्सले जेलेन्स्कीलाई सञ्चारकर्मीसमक्ष हप्काएका थिए। ट्रम्प र भान्सको व्यवहारको अमेरिकाकै सिनेटर र पूर्व सभामुखले समेत आलोचना गरेका छन्।
पेन्सिलभेनिया डेमोक्र्याटिक पार्टीकी सांसद मेडेलिन डीनले त ट्रम्प र भान्सले उनीहरूले गरेको ‘अपमानजनक व्यवहार’को लागि माफी माग्नुपर्ने बताएकी छन्।
‘उनीहरूले सात कक्षाका झगडालु विद्यार्थीसँग गरेजस्तै जस्तै व्यवहार गरे’, मेडेलिन डीनले बीबीसीको द वर्ल्ड टुनाइटलाई बताइन्।
मेडेलिन डीनले जेडी भान्सलाई विवाद बढाउन मुख्य भूमिका खेलेको आरोप लगाउँदै माफी माग्न समेत आग्रह गरिन्।
यसमा अलावा अमेरिकी कांग्रेसकी पूर्व सभामुख न्यान्सी पेलोसीले ह्वाइट हाउसमा भएको घटनालाई ‘अपमानजनक व्यवहार’ भनेकी छिन्।
‘युक्रेनका निर्वाचित नेतालाई राष्ट्रपतिको कार्यालयमा आमन्त्रित गर्नु र सम्मानजनक तरिकाले उहाँसँग कुराकानी गर्नु संयुक्त राज्य अमेरिकाका राष्ट्रपतिको लागि शक्ति प्रदर्शनको ठूलो प्रदर्शन हुने थियो,’ उनले भनिन्, ‘तर राष्ट्रपति ट्रम्पको अपमानजक व्यवहार भयो। पुटिन यो अवस्थामा धेरै खुसी हुने छन्।’
फागुन १७, २०८१ शनिबार १०:३७:३४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
