प्रधानमन्त्री कप क्रिकेटको छनोटमा काठमाडौंले बनायो ४३० रन, इसान र रितको शतक
काठमाडौं : प्रधानमन्त्री कप राष्ट्रिय क्रिकेट प्रतियोगिताका लागि बागमती प्रदेशको छनोटमा काठमाडौं जिल्लाका दुई खेलाडी इसान पाण्डे र रित गौतमले शतक बनाएका छन्।
मुलपानी क्रिकेट मैदानमा भइरहेको छनोटमा भक्तपुर जिल्लाविरुद्धको खेलमा इसान र रितले शतक बनाएका हुन्। टस जितेर पहिला ब्याटिङ गर्ने निर्णय गरेको काठमाडौंले निर्धारित ५० ओभरमा सात विकेट गुमाएर ४३० रन बनायो।
इसानले ११० बलमा १७३ रन बनाउँदा रितले १२५ बलमा १३४ रन बनाए। त्यसबाहेक उत्तम केसीले २६ बलमा ४३ रनको पारी खेल्दा पृथु बास्कोटाले १२ बलमा २३ रन बनाए।
भक्तपुरका हर्क बहादुरले चार विकेट लिँदा सक्रिय, सुवास र आकाश गुप्ताले समान एक–एक विकेट हात पारे।
भक्तपुरले केहीबेरमा जवाफी ब्याटिङ गर्नेछ।
प्रधानमन्त्री कपको बागमती छनोटका लागि दुई स्थानमा खेल भइरहेका छन्। काठमाडौंको मुलपानी क्रिकेट मैदानमा काठमाडौं, ललितपुर, भक्तपुर र त्रिभुवन विश्वविद्यालय भिडिरहेका छन्।
उता चितवनको भरतपुरमा भने चितवन, मकवानपुर र नुवाकोटले प्रतिस्पर्धा गरिरहेका छन्। मुलपानीमा खेलिरहेको टोलीलाई समूह ‘ए’ भन्दा भतरपुरमा खेलिरहेको टोली समूह ‘बी’ हुन्।
दुवै समूहबीचका शीर्ष दुई टोलीले सेमिफाइनल हुँदै फाइनल खेल्नेछन्। सेमिफाइनल र फाइनलका सबै खेल मुलपानीमा हुनेछ।
फागुन १६, २०८१ शुक्रबार १३:१५:४० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
