हमासले आज थप चार शव इजरायललाई हस्तान्तरण गर्ने
काठमाडौं : प्यालेस्टिनी लडाकु समूह हमास र इजरायलले समानान्तर रूपमा आज बन्धक र कैदी रिहा गर्दैछन्।
गत साता रिहा गर्ने भनिएका ६ सयभन्दा बढी प्यालेटिनी कैदी रिहा गर्ने विषयमा इजरायल सहमत भएसँगै गाजा युद्धविराम भङ्ग हुने खतरा तत्कालका लागि टरेको छ।
हमासले आज चार जना मृतक बन्धकको शव इजरायललाई हस्तान्तरण गर्नेछ।
हमासले गत शनिबार ६ जना बन्धक रिहा गरेपछि सोही दिन नै इजरायलले ६ सयभन्दा बढी प्यालेस्टिनी कैदी रिहा गर्नुपर्ने थियो।
तर, इजरायलले बन्धक रिहाइ अपमानजनक भएको आरोप लगाउनुका साथै थप बन्धक रिहाइ सुनिश्चित नहुँदासम्म ती ६ सयभन्दा बढी प्यालेस्टिनी कैदीको रिहाइ अनिश्चितकालका लागि स्थगन गरेको जनाएको थियो।
तर, हमास र मध्यस्थकर्ता देशहरूबीच कायरोमा भएको वार्तामा बन्धक साटासाट सम्बन्धमा सहमति जुटेको हो।
हमासले अहिलेसम्म २० गैरसैनिक र पाँच सैनिक गरी २५ जना जीवित इजरायली बन्धकका साथै ४ इजरायली बन्धकको शव हस्तान्तरण गरिसकेको छ।
यसका अतिरिक्त हमासले छुट्टै सहमति अन्तर्गत पाँच जना थाई बन्धकलाई पनि रिहा गरिसकेको छ। प्रत्युत्तरमा इजरायलले करिब एक हजार प्यालेस्टिनी कैदी रिहा गरिसकेको छ।
फागुन १५, २०८१ बिहीबार ०७:५२:५१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
