अफगानिस्तानसँगै पराजित भएसँगै इङ्ग्ल्याण्ड च्याम्पियन्स ट्रफीबाट बाहिरियो
एजेन्सी : अफगानिस्तानसँग पराजित भएसँगै इङ्ग्ल्याण्ड च्याम्पियन्स ट्रफी २०२५ बाट बाहिरिएको छ।
अफगानिस्तानसँग बुधबार ८ रनले पराजित भएसँगै इङ्ग्ल्याण्ड प्रतियोगिताको समूह चरणबाट नै बाहिरिएको हो।
३ सय २६ रनको बलियो लक्ष्य पछ्याएको इङ्ग्ल्याण्ड ४९.५ ओभरमा ३ सय १७ रनमा समेटियो।
अफगानिस्तानले इङ्ग्ल्याण्डमाथि ओडिआईमा दोस्रो पटक जित हासिल गरेको हो। दुई वर्षअघि भारतमा भएको ओडिआई विश्वकपमा पनि अफगानिस्तान विजयी भएको थियो।
इङ्ग्ल्याण्डका लागि जो रुटले सर्वाधिक १ सय २० रन जोडे। उनले १ सय ११ बलको सामना गर्दै ११ चौका र १ छक्का प्रहार गरे। ओडिआई करियरको १७औं शतक रुटले ९८ बलमा पूरा गरे।
कप्तान जोन रुट र बेन डकेटले समान ३८ तथा ह्यारि ब्रुक २५ रनमा आउट भए। ओपनर फिल साल्ट १२ रनमा आउट हुँदा जेमी ओभरर्टन २८ बलमा ३२ रन जोड्दै आउट भए।
अफगानिस्तानका लागि अजमतुल्लाह उमरजाईंले ९.५ ओभरमा ५८ रन खर्चिएर ५ विकेट लिए। मोहम्मद नाबीले २ तथा फैजल हक फारुकी, गुलबदीन नैब र राशिद खानले समान १ विकेट लिए।
त्यसअघि पाकिस्तानको लाहोरमा रहेको गद्दाफी अन्तर्राष्ट्रिय क्रिकेट स्टेडियममा टस जितेर ब्याटिङ गरेको अफगानिस्तानले निर्धारित ५० ओभरमा ७ विकेट गुमाएर ३ सय २५ रनको बलियो योगफल तयार गरेको थियो।
अफगानिस्तानका लागि इब्राहिम जाद्रानले सर्वाधिक १ सय ७७ रन जोडेका थिए। उनले १ सय ४६ बलको सामना गर्दै १२ चौका र ६ छक्का प्रहार गरेका थिए।
जाद्रानले अफगानिस्तानका लागि च्याम्पियन्स ट्रफीमा ऐतिहासिक पहिलो शतक प्रहार गरे। अफगानिस्तानको लागि च्याम्पियन्स ट्रफीको दोस्रो खेलमा नै यो सम्भव भएको हो।
अफगानिस्तानका लागि जाद्रानले नै २ वर्ष अघि ओडिआई विश्व कपमा पनि पहिलो शतक प्रहार गरेका थिए। ओडिआई करियरको छैठौं शतक जाद्रानले १ सय ६ बलमा पूरा गरे।
जाद्रानले १ सय ५० रन १ सय ३४ बलमा पूरा गरे। जाद्रानले च्याम्पियन्स ट्रफीमा सर्वाधिक व्यक्तिगत रनको कीर्तिमान समेत बनाए।
गत शनिबार अस्ट्रेलियाविरुद्धको खेलमा इङ्ग्ल्याण्डका बेन डकेटले बनाएको १ सय ६५ रनको कीर्तिमान उनले तोडेका हुन्।
३७ रनमा ३ विकेट गुमाएर कठिन अवस्थामा पुगेको अफगानिस्तानका लागि जाद्रान र कप्तान हशमतुल्लाह शाहिदीले १ सय ३ रनको साझेदारी गरे। कप्तान शाहिदीले ६७ बलमा ३ चौकाको सहयोगमा ४० रन जोडे।
पाँचौ विकेटका लागि जाद्रानले अज्मतुल्लाह उमरजाइसँग मिलेर ७२ रनको महत्वपूर्ण साझेदारी गरे। उमरजाइ ३१ बलमा १ चौका र ३ छक्काको सहयोगमा ४१ रन जोड्दै आउट भए।
छैठौं विकेटका लागि मोहम्मद नाबीसँग जाद्रानले १ सय ११ रनको साझेदारी गरे। नाबीले २४ बलमा २ चौका र ३ छक्काको सहयोगमा ४० रन जोडे।
इङ्ग्ल्याण्डका लागि जोफ्रा आर्चरले ३, लियम लिभिङ्स्टोनले २, जेमी ओभरर्टन र आदिल राशिदले समान १ विकेट लिए।
पहिलो खेलमा पनि पराजित भएको इङ्ग्ल्याण्ड लगातार दोस्रो हारका साथ प्रतियोगिताबाट बाहिरिएको छ। इङ्ग्ल्याण्ड पहिलाे खेलमा अस्ट्रेलियासँग पराजित भएको थियो।
जितसँगै अफगानिस्तानले सेमिफाइनलमा स्थान बनाउँने सम्भावना कायमै राखेको छ। सेमिफाइनलमा स्थान बनाउँन अफगानिस्तानले शुक्रबार हुने खेलमा अस्ट्रेलियालाई पराजित गर्नुपर्ने हुन्छ।
फागुन १५, २०८१ बिहीबार ०७:३२:०७ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
