एकै रातमा हिरोइन फेरियो, वर्षाले लिइन् आँचलको ठाउँ

काठमाडौं : नेपालका प्राय: राजनीतिक घटनाक्रम रातमै भएका प्रशस्त उदाहरण छन्। संविधान निर्माण होस्, चाहे सत्ता परिवर्तन। अघिल्लो दिन एउटा प्रधानमन्त्री पाएको देशमा रातारात सत्ताको खेल हुन्छ।

यस्तो अनिश्चितता र अस्थिरता राजनीतिमा मात्र होइन, नेपाली फिल्म क्षेत्रमा पनि छ। यहाँ फिल्मको शुभ मुहूर्तमा आएर अचानक अभिनेत्री परिवर्तन हुन्छन्। त्यसको पछिल्लो उदाहरण हो- चलचित्र ‘हर्ष’।

निर्माण टिमले फिल्ममा खगेन्द्र लामिछाने र आँचल शर्माको मुख्य भूमिका रहने भन्दै सञ्चारकर्मीलाई बोलाए पनि बुधबारको कार्यक्रममा भने अर्कै नायिका देखिइन्। महाशिवरात्रिका दिन निर्माण टिमले ठमेलमा रहेको त्रिदेवी मन्दिरमा फिल्म ‘हर्ष’को मुहूर्त कार्यक्रम राखेको थियो।

समयमै कार्यक्रममा पुगेका अभिनेता खगेन्द्रलाई सञ्चारकर्मीले भेटेर तस्बिर पनि खिचे र अभिनेत्री आँचल शर्मालाई पर्खिए। तर, आँचलको फोटो भिडियो खिच्न उभिएका मिडियाकर्मीहरूले वर्षा राउतलाई देखे। त्यसपछि बल्ल थाहा भयो। आँचल होइन वर्षाको यो फिल्मको हिरोइन रहिछन् भनेर।

आँचललाई प्रश्न सोध्न तयार भएका मिडियाकर्मीहरूले अर्को प्रश्न पाइहाले। उनीहरुले वर्षालाई सोधे, ‘यो फिल्ममा त आँचल शर्मा हिरोइन भन्ने हल्ला थियो त! तपाईं पो हुनुहुन्छ त?’

‘कहिलेकहीँ जे हुन्छ राम्रैको लागि हुन्छ,’ उनले निर्देशक पौडेलतर्फ हेर्दै भनिन्, ‘मैले निर्देशक म्यामसँग पनि कुरा गरेको थिए। आँचललाई थाहा छ यो सबै कुरा भनेर। उहाँले अँ, राम्रै तरिकाले कुरा गरेर नै हामी अगाडि बढेको हो भन्नुभयो।’
यता निर्देशक पौडलले आँचल अर्को फिल्मको काममा व्यस्त भएकाले यसमा समय दिन नपाएको दाबी गरिन्।

यसअघि वर्षा र खगेन्द्रले दिपेन्द्र के खनालको फिल्म ‘मेयर’मासँगै काम गरिसकेका छन्। यो फिल्म प्रदर्शनमा आएको छैन। खगेन्द्रसँग पुनः काम गर्न पाउँदा वर्षा पनि मख्ख थिइन्। उनले यसलाई भगवानले जुराएको भन्न भ्याइन्।

फागुन १४, २०८१ बुधबार १४:०९:५६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।